Un acuerdo pa brinda cursonan na Aruba riba nivel di bachelor 

ORANJESTAD - Durante dianan 1 y 2 di mei tabatin un conferencia regional den Radisson Hotel cu tabatin como topico ‘Retonan y futuro trendnan pa Wafnan Caribense’, un acuerdo di ‘Joint Venture’ a tuma luga entre e grupo STC Holding BV di Hulanda y Universidad di Aruba. Ambos partido cu a firma e acuerdo aki ta institucionnan renombra cu ta brinda training y educacion riba varios tereno.

SCT ta un combinacion strategico mundial di bon educacion, training, estudio, sosten, consultancy y servicio di implementacion pa henter e cadena di nabegacion, waf, transporte y logistica, mescos tambe pa tur loke tin di haci cu e industria petrolero y kimico cu ta relata cu waf. STC ta organisa training y educacion riba tur nivel, di profesional te cu nivel di master. Universidad di Aruba ta brinda programanan riba nivel di bachelor y master y tambe training riba varios tereno relata cu e programanan aki y ta capacita pa brinda estudio, proyectonan y consultancy.

Door di bay den un partnership cu otro, STC di Hulanda y Universidad di Aruba por optimalisa nan educacion, cursonan y training pa loke ta calidad, eficiencia y posicion di mercadeo na Aruba y e region Caribense. E trainingnan cu entre otro ta bay wordo organisa door di e ‘Joint Venture’ aki ta enfoca riba nabegacion y aviacion, ta brinda un maneho di cadena y logistica riba nivel di bachelor. E duracion di e trainingnan ta varia entre 1 pa 3 siman. E intencion ta pa start cu e prome training na luna di juni-july 2015.

E acuerdo di e ‘Joint Venture’ a wordo firma pa Albert Bos, director di STC Group Holding BV y Glenn Thode, rector di Universidad di Aruba, Prome Minister di Aruba Mike Eman y director di Directie Scheepvaart Carlyle de Coteau. Esaki a sosode den presencia di esnan cu a atende e conferencia den Radisson Hotel. 

Expresionnan haci den e articulo aki no necesariamente ta refleha opinion di ArenaPoliti.co