Raymond Maduro ta un di e bon amigonan di Sr. Nelson Sprok cu tabata presente diamars atardi durante ceremonia di inauguracion di Caya Nelson Florencio Sprok. Como un persona cu conoce Nelson pa hopi aña, e ta para totalmente tras di e decision pa rindi honor na dje pa medio di e gesto aki. E ta admira Sprok pa su integridad, dedicacion na trabou y famia, pero tambe na su comunidad. E ta consider’e un ehempel pa nos tur sigui. “Claro cu Gobierno tabatin rason di nombra e caya aki como un homenahe na un gran persona manera Nelson,” Maduro a afirma.

El a conta brevemente con den decada di 70, ora Maduro a cuminsa haci proyectonan di construccion, Nelson Sprok ta un di e prome hendenan cu el a traha cune pa loke ta trata e trabou di plumbing. “E ta un homber hecho y derecho cu un caracter fuerte. Nunca el a bende su alma ni su caracter pa placa. Si e cos ta asina e mester... ta asina e ta; e no ta cambi’e...e no ta cremencha. Den su trabou, semper el a haci trabou corecto,” Maduro a splica.

For di e trabou hunto a nace un amistad cu a perdura añanan largo, te hasta ora Maduro a bay un tempo for di Aruba. “Mi ta consider’e un ehempel di un guy cu ta traha duro y haci algo pa su pais.” Den e aspecto familiar, Maduro a conta cu “tambe loke ta bunita di Nelson, el a transmiti hopi di su bon cosnan pa su amigonan y su yiunan, cos cu no tur ora ta pasa. Si bo wak su yiunan, tur ta hendenan bon forma, cu bon caracter y bon etica di trabou.”

Mescos cu Raymond Maduro, Nelson Sprok ta conta cu e aprecio y admiracion di hopi otro persona den e sector di construccion. Cu su 75 aña el a retira di e operacion diario di Conar N.V. y a pasa esaki over pa su yiunan mientras cu su mes ta pasa tempo dedica na plantamento den cunucu. Diamars atardi, famia y conocinan a presencia momento cu Gabinete Mike Eman II a dedica e caya principal di Washington como Caya Nelson Florencio Sprok. E ocasion a conta tambe cu bendicion di Pastoor Jairo Maduro.

Expresionnan haci den e articulo aki no necesariamente ta refleha opinion di ArenaPoliti.co