ORANJESTAD – Mas cu 120 mucha di 1ste te cu 6de klas di Fatima College a enrikese nan conocement musical door di un ‘pilot-project’, Formacion Musical pa Scol Basico, cu a wordo introduci como prueba na e scol basico aki. Na final di e prome aña el a crea hobennan entusiasma cu loke nan a siña y cu gana pa sigui cu e lesnan y siña toca un instrumento musical.

E proyecto aki a wordo introduci door di Team BoBario di Ministerio di Asuntonan General di Prome Minister Mike Eman cu e meta pa introduci musica como un parti di loke e muchnan ta haya na scol y na e mesun momento crea un forma di entretenimento sano bou di e hobennan.

Sr. Franklin Richardson, cabesante di Fatima College na Dakota, ta corda ainda ora cu el a  wordo aserca door di Amado Rosina “pa saca for di baul loke cu Amado semper tabatin den su curason pa duna e muchanan formacion musical”.

Hunto a sinta kibra cabes pa mira con ta bay reparti e temanan, cuminsando di principio, loke cu cada klas lo haya, te pa ora cu yega den 6de klas e muchanan tin e formacion completo. “Esaki ta e fruta cu nos tin awe cu nos ta mira con tiki tiki ta hinca e musica den e muchanan y por a mira con e muchanan a siña y disfruta di esaki,” e docente a duna di conoce.

E por bisa cu e muchanan tabata hopi entusiasma, nan a siña musica di un otro angulo, cual ta e parti mas importante di e proyecto aki. Tambe por a constata con e muchanan mes tabata trece instrumentonan manera piano, bongo, maraca, etc., special ora cu nan tin e les di formacion musical. E entusiasmo tabata crece cu cada les y e muchanan tabata kier a sigui mas ainda.

Prome Minister Eman, Amado Rosina y Franklin Richardson a duna nan declaracion rondona door di studiantenan di Fatima College, y tabata por a mira riba nan cara con contento nan tabata di por a siña un vak un poco diferente y cual tabata yuda nan relaha, y pasa dushi, manera e hoben Jean-Louis Amaya a comenta. Cada biaha cu meneer Amado presenta, e les ta bira mas dushi pa sigui, el a bisa. Y a bisa cu nan a siña cu tur cos ta musica, hasta e ritmo di nan pasonan ta un tipo di musica. E mes ta un hoben cu gusta musica y ta gusta drum y guitarra, di cual e ultimo aki e ta tumando les di dje.

Mayoria di e hobennan a expresa cu nan a haya gana di siña toca un of otro instrumento y tur esaki tabata door di e les di formacion musical cu nan a haya den e aña escolar cu ta finalisando.

Expresionnan haci den e articulo aki no necesariamente ta refleha opinion di ArenaPoliti.co