ORANJESTAD – Den e biahe cu Prome Minister Eman a realisa pa Canada, Aruba a haya un tremendo cooperacion di e Consul General di Reino Hulandes na Canada sr. Anne Gerard van Leeuwen.

Danki na e bon cooperacion ricibi for di su oficina y staf, Prome Minister Mike Eman su agenda por a wordo ehecuta sin algun problema, specialmente mirando con yen e agenda tabata. Como orador invita na The Toronto global Forum, prome Minister a asisti na tambe na otro reunionnan di e conferencia na Toronto. Pero banda di esaki, su agenda tabata yena cu reunionnan importante pa Pais Aruba riba diferente nivel. Un di e reunionnan importante tabata cu representantenan di Universidad, instituto y negoshinan di ‘Waterloo Region’.

Waterloo Region tin un economia di conocemento y servicio hopi desaroya, cu dos universidad grandi; University of Waterloo y Wilfrid Laurier University. E sector economico conoce varios companianan conoci mundialmente den sector high-tech cu a desaroya rond di e universidadnan aki. ‘Research In Motion Limited’ (Telecomunicacion y Wireless), ‘Sandvine’ (Networking) y ‘MapleSoft’ (software) ta djis algun di e companianan mundialmente conoci di Waterloo Region. E ciudad ta cede di investigacionnan innovativo den varios otro ramo cientifico manera fisica, Ingenieria, matematica y ciencianan politico. E region ta parti tambe di Canada su ‘Research Triangle’ (CTT), hunto cu ciudadnan di Kitchener y Cambridge.

El a splica cu a prepara varios reunion na Waterloo Region, unda cu tin varios universidad cu ta conoci pa nan experticio den sector ICT. E consul a percura cu Prome Minister Eman no solamente por a scucha e lidernan den e area aki, sino tambe e por a duna un splicacion di su maneho, pero principalmente e metanan poni den sector di energia renovabel cu kier cumpli cu nan pa 2020.

E Consul por a sinti un interes grandi den loke Eman a splica den e encuentronan na Waterloo Region. Tabatin special interes cerca empresanan con e sistema di panelnan solar ta funciona na Aruba y e programa di Smart City, cu ta algo bon pa Aruba pero tambe pa e empresanan cu ta traha den e sector aki.

Waterloo Region tin algo similaridad cu e ciudad Hulandes Eindhoven. E ciudad aki ta wordo considera e “brain port” di Hulanda loke cu Waterloo ta na Ontario, Canada. Nan ta wordo considera ‘Intelligen Cities’. Eindhoven a wordo escogi como e ciudad mas inteligente di mundo na 2011 y tin un relacion di cooperacion di basta aña caba cu Waterloo Region, apoyando esnan cu tin ideanan nobo, pero tambe trahando hunto riba tereno di investigacion y enseñansa. “E ta un conexion cu Aruba por uni su mes na dje facilmente,” segun e Consul General Hulandes.

Pa Aruba un relacion asina ta hopi importante. Den e encuentro tin dos aspecto cu a sali bon cla dilanti y esakinan ta e conocemento grandi cu tin den e region riba tereno di energia renovabel, durabilidad y sostenibilidad y e forma con universidadnan local y Gobierno ta apoya hobennan cu a caba di gradua y cu tin bon ideanan cu por wordo implementa cu exito. Esakinan, e consul ta considera, ta ideanan yen di inspiracion. Pero tambe tin empresanan interesa si nan por contribui den e terenonan ariba menciona na Aruba.

E biahe y bishita di Prome Minister Mike Eman y su delegacion pa Ontario, Canada, a contribui pa e Consul General siña conoce e infrastructura na Aruba miho, e maneho di e Gobierno y su ambicion pero principalmente con nan como Consulado General lo por contribui cu Aruba na Canada.

Expresionnan haci den e articulo aki no necesariamente ta refleha opinion di ArenaPoliti.co