Prome Minister Eman: “Cancha di futbol ta trece alegria riba cara di hobennan”
Gobierno ta traha pa logra 10 mini cancha deportivo
ORANJESTAD – Despues di tabatin e honor di pone e prome piedra pa e mini cancha di futbol na Bushiri, Prome Minister Mike Eman a wordo invita door di RCA pa tene un discurso na inauguracion di nan mini veld di bala, di yerba artificial. E mandatario a bisa cu for di momento cu su gobierno ta na mando, a papia di sirbi pueblo. Esaki ta nifica tambe sirbi e muchanan di Aruba. Pesey e ta mira cu hopi satisfaccion e trabou cu ta wordo haci door di boluntarionan, cu a logra construi e veld di RCA y cu a yuda tambe den realisacion di esun di Jaburibari y Brazil.
Gobierno di Aruba, lidera pa Prome Minister Mike Eman, kier mira cu e deporte di futbol sigui crece na Aruba, pa cual e mandatario tabata masha contento cu dialuna a cuminsa cu ponemento di e prome piedra pa un cancha deportivo di yerba na Bushiri y atardi a inaugura esun di RCA.
E meta di Prome Minister Eman, manera cu el a splica den su discurso ta pa logra 10 di e mini canchanan deportivo cu yerba artificial rond Aruba den dos aña di tempo. Tur esaki na bienestar di e muchanan cu ta cuminsa cera conoci cu futbol. “Intencion di Gobierno ta pa nos ubica por lo menos 10 di e canchanan aki. Pa esaki nos ta enfoca riba e barionan unda cu tin hopi mucha y no tin facilidadnan di deporte y recreacion.”
E mandatario a expresa di ta sinti un satisfaccion grandi cu su Gobierno ta trahando riba e tipo di proyectonan aki, mas ainda ora cu mira e alegria di e muchanan aki na momento cu nan subi e cancha pa hunga futbol. Canchanan deportivo ta un di e metanan cu kier logra den tur bario di Aruba.
Pa e mandatario ta masha importante cu e rikesa di pais Aruba ta wordo reparti den forma husto pa cual a cuminsa cu un plan grandi di renobacion di barionan bou di e prome gobernacion cu el a lidera y esaki a sigui den e actual gobernacion. No solamente casnan bunita, pero tambe facilidadnan di recreacion cu por wordo uza tanto door di menor como adultonan.
Expresionnan haci den e articulo aki no necesariamente ta refleha opinion di ArenaPoliti.co