STA. CRUZ – Tin un discusion serio andando den Reino Hulandes pa loke ta trata screening di minister. Den reino tanto Sint Maarten como Curacao conoce leynan bastante estricto pa cu screening. Hulanda no tin ley, pero tin regla y maneho tocante screening. Asina mes Hulanda no ta confiía e sistema di screening di Sint Maarten manera nos por a tuma nota anja pasa, y kier uno mucho mas estricto. Curacao su parlamento a acepta un mocion pa Gobernador no tin mucho mas di bisa den e screening. Pero con ta para cu Aruba mes? lider di MEP-Evelyn Wever-Croes a puntra.
Na Aruba e screening di ministers no ta tuma lugar pa Gobernador, sino pa e formador. Na Aruba screening no ta regla den e ley formal ‘landsverordening’, sino den ‘landsbesluit’, cu por wordo cambia pa gobierno mes sin pasa Parlamento. E ministernan actual a pasa screening na man di Mike Eman den su calidad como formador, algo cu ta totalmente inaceptable. Tin paisnan ta permiti e formador hasi e screening, solamente si e formador no ta un candidato pa minister tambe. Pues aki nos ta mira cu aki na Aruba no tin reglanan estricto pa loke ta trata screening, y Gobernador no ta hunga un rol mes importante den e proceso aki. Ta pesey esnan cu a bira minister na 2013, por a hasi esaki sin problema.

“Mi ta puntra mi mes si e reglanan estricto cu Hulanda kier aplica awor pa Aruba tambe, ta cuanto di e 9 ministernan nos lo tin awor. Pasobra den e reglanan estricto hamas nan lo a wordo acepta. Djis pa duna algun ehempel:
Un persona cu a fia 2 miyon florin for di Interbank, sin mester paga interes, y nunca a paga esaki bek; den cual te hasta e banco a coopera cu ne pa no manda su negoshi bancarota, djis pa e no perde eleccion, abo ta kere cu e por a bira minister?
Un persona cu tabata envolvi den escandalo miyonario cu a haya placa bou mesa pa ‘fix papel’, abo ta kere cu e por a bira minister?
Un persona cu a horta coriente, y a wordo sentencia pa esaki, bo ta kere cu e por a bira minister?
Un persona cu contra ley no ta cambia su adres na Bevolking, y ta duna opdracht na bevolking pa nan no persigi’e, bo ta kere cu e merese di bira minister?
Un persona cu ta fix su mes un deal di kwijtschedling di belasting, hamas por bira minister na Hulanda. Y asina tin mucho mas.
Pesey nos di MEP ta propone pa bin reglanan estricto pa loke ta trata screening di ministernan, y pa regla esakinan den ley formal, ‘landsverordening’. Tambe reglanan pa loke ta trata financiamento di partidonan politico, pa evita tanto faboresemento na financiadornan di campanja di AVP.  Y sigur mester un ministerio publico cu tin curashi pa investiga e gobernantenan corupto aki. Ta solamente asina nos por garantisa cu nunca mas ripiti cu hendenan cu reputacion dudoso manera esunnan na mando awor por drenta gobierno”, líder di MEP Evelyn Wever-Croes a duna di conoce.

Expresionnan haci den e articulo aki no necesariamente ta refleha opinion di ArenaPoliti.co