ORANJESTAD --  Den cuadro di preparacionan pa e tratamento di presupuesto 2016 parlamentarionan di MEP  ta bishitando scolnan rond Aruba. E motibo principal ta pa scucha kiko ta e retonan cu scolnan ta confronta nan mes cune den e mundo di enseñansa. Hecho ta cu e informacion cu parlamento ta haya ta limita, hasiendo e dificil pa husga kiko di berdad ta e necesidadnan riba e tereno di enseñansa.

“Enseñansa ta un tema hopi importante cual den parlamento semper ta nos tarea pa por percura cu e ta haya mas fondo for di e presupuesto. E bishitanan ta bayendo hopi bon y loke ta resalta hopi ta e entusiasmo serca e cabesantenan y docentenan, e dedicacion y amor pa nan trabou y pa nan studiantenan. Ora mi mira esaki mi ta convenci cu esaki ta e forsa lo bai hiba nos progresa y eleva calidad di ensenjansa”, segun lider di fraccion di MEP Evelyn Wever-Croes.

CELEBRACIONNAN A WORDO PROHIBI PA SKOA
Remarcabel si ta e hecho cu scolnan cu ta cai bou SKOA ta wordo prohibi pa organisa actividadnan di sinterklaas, Pasco, carnaval, Dia di Betico, Dia di Himno y Bandera, dera gai. Loke mas ta di lamenta ta cu scolnan no mag acepta tampoco niun donacion pa organisa actividadnan. “Mi ta lamenta esaki pasobra cada celebracion ta yuda e mucha den su desaroyo, mirando cu e cantidad di ora pa duna les no ta suficiente pa sinja e mucha tur skills.

Ademas, e caso cu a bai corte no ta problema entre mayor cu e scol, sino mas bien entre gobierno y SKOA. E ta un impasse rioba e schoolgeld, no riba e placa di actividad. Mayornan tampoco ta haya husto cu nan yiunan ta wordo perhudica di e forma ey. Mi ta lamenta cu net nos muchanan ta esnan cu ta bira e victima pa haya enseñansa di calidad of por festeha cualkier tipo di actividad. Nos ta spera cu e impasse por wordo soluciona pronto y cu nos muchanan no sali perhudica. Y di aki mi ta urgi minister encarga cu ensenjansa, Michelle Hooijboer-Winklaar, pa percura pa soluciona e impasse aki prome cu e celebracion di Sinterklaas. Pasobra no ta husto cu tur mucha cu ta bai scolnan di SKOA ta wordo perhudica di e forma aki. E placa di actividad y celebracion no tin net nada di haber cu e placa di scol. Pa loke ta schoolgeld hues a dicta cu esey no mag cobra mayornan, pues gobierno mester suministra e placa ey. Otro aña nos lo tin celebracionan grandi en coneccion cu celebracion di 30 anja di nos Status Aparte y 40 anja di nos Himno y nos Bandera. Di berdad nos ta spera cu e fondonan por wordo aloca pa hasi e celebracion aki grandi tambe pa nos muchanan cu ta bai scol” tabata palabranan di Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co