PARLAMENTARIO DI AVP NO TA ASUMI NAN RESPONSABILIDAD  

ORANJESTAD – Parlamento diaranson ultimo a trata e ley di Jaarrekening 2013. “Den e rapport di Algemene Rekenkamer y conseho di Raad van Advies a resulta cu gobierno di Mike Eman a gasta 36 miyon florin mas cu el’a wordo apodera p’e, y apesar cu nan tin un obligacion legal pa duna responsabilisacion, nan a nenga pa duna splicacion unda e 36 miyon florin ey a bai, y dicon nan a gasta e placa ey SIN autorisacion di Parlamento. Un gobierno ta mara na e aprobacion financiero di Parlamento pa loke ta trata e gastonan cu e mag di hasi. E aprobacion aki ta wordo duna den e presupuesto, y si ta necesario den e presupuesto supletorio. Pa anja 2013 gobierno aki a propone su mes pa den anja 2013 tin un deficit di 175 miyon florin; esaki a base di e cuadro financiero di gobierno mes. Sin embargo dia nan a manda e presupuesto parlamento ya caba nan a pone un deficit mas halto, 223 miyon. Despues di campanja electoral na 2013, nan a realisa cu nan a gasta 85 miyon florin dimas cu e presupuesto a permiti nan, y na fin di anja nan a informa Parlamento cu e deficit ta hopi mas halto y a pidi un apoderacion atrobe, e biaha aki pa e deficit pa 2013 bira 308 miyon. Sin embargo awor Algemene Rekenkamer ta constata cu te hasta esey nan a viola, pasobra e deficit real ta 344 miyon florin, pa cual nan NO tabata tin autorisacion.
Tanto Algemene Rekenkamer como Raad van Advies a declara cu esaki ta ilegitimo, y a urgi Parlamento pa no laga e rapportnan aki den lachi, pero tuma accion.
Dia Algemene Rekenkamer a entrega e rapport aki, anja pasa augustus, sr. Ling Wong a adverti Parlamento pa tuma accion. Sr. Wing a bisa cu no por ta asina cu un gobierno ta djis gasta mas placa cu Parlamento a dune, y no tin sanccion. Sr. Ling Wong a bisa tambe, miho Parlamento asumi su responsabilidad y controla gobierno bon, sino otro ta bin hasi esey. Y esey ta hustamente locual cu a pasa, cu CFT.
Pero nos, di fraccion di MEP, esey nos a hasi awe, nos no a laga e rapport den lachi, nos a hasi pregunta, nos a acudi hasta na Ministerio Publico, y awor nos ta den Parlamento pa cuestiona con un gobierno por a gasta asina tanto placa di pueblo den eleccion, y riba dje, a gasta 36 miyon pa cual e no tabata tin autorisacion.
Lamentablemente e 13 parlamentarionan di AVP a demostra un biaha mas cu nan no ta den Parlamento pa hasi nan trabou manera nan a huramenta p’e, sino simplemente como  ‘ja-knikker’ di gobierno.Nan a core pa nan responsabilidad. Cada un di nan a demostra cu nan ta legalisa cualquier ilegalidad, basta nan por keda sinta riba e stoel ey. Sin argumento, nan a aproba e robo di 36 miyon florin, algo cu ta berguensa. Cu Parlamentarionan asina hamas nos Parlamento por exigi respet, ni tampoco haya respet. Mi tin berguensa di ta forma parti di e Parlamento aki. Nos no ta lag’e te akinan, awor nos lucha ta sigi pafo di Parlamento pa denuncia e ilegitimidad di e ley aki, y pa expone e ladronicia  di Mike Eman y su “bende”, na cual e 13 parlamentarionan di AVP awor a bira complice y mester duna cuenta na husticia p’e” lider di MEP Evelyn Wever-Croes a declara.

Expresionnan haci den e articulo aki no necesariamente ta refleha opinion di ArenaPoliti.co