Angel Bermudez: Institutonan Financiero cu hopi disponibilidad pa inverti na Aruba
Siman pasa Minister di Finanzas Angel Bermudez a haci un viahe pa New York como tambe pa Boston pa asina reuni cu diferente institutonan financiero y informa tocante e ultimo desaroyonan na Aruba y kico ta e expectativanan di e añanan venidero.“Na cierto momento ora cu nos busca financiamento pa nos presupuestonan y tambe pa e debenan cu ta cancela y cu mester wordo refinancia, ta e institutonan aki basicamente ta esunnan cu ta inverti”, asina e mandatario a splica.
Minister Bermudez ta enfatisa cu e programa tabata uno hopi intensivo sin embargo e diferente reunionnan a bay bon. Tanto e director di departamento di Finanzas, Sr. Werleman y e tesorero, Sr. Paris tambe a forma parti di e ‘roadshow’.
Na Boston e mandatario di finanzas a bishita entre otro e institutonan manera Fidelity, John Hancock, Wellington, Eaton Vance mientras cu na New York Minister Bermudez a reuni cu Lord Abbett, Goldman Sachs, Credit Suisse y algun otro instituto mas caminda cu e la duna un presentacion tocante e situacion financiero actual di e finanzas publico di Aruba y tambe a presenta e expectativanan pa loke ta trata e crecemento economico den e añanan venidero.
Di mesun forma e mandatario di finanzas a informa kico ta spera di e presupuestonan di aña 2015, 2016 y 2017, con Gobierno di Aruba kier yega na un presupuesto balansa cu un ‘cero deficit’ pa 2017/2018 y kico ta e manehonan cu mester hiba pa logra esaki.
E reformanan tambe tabata un punto di discusion unda cu Minister Bermudez a splica detayadamente con ta elaborando riba nan, por ehempel, e reforma di e sistema di pensioen pa e empleadonan publico cu tambe lo wordo trata den parlamento pa fin di e temporada aki. Sin laga afo reforma fiscal pa loke ta trata tur nos leynan di impuesto y tambe e reforma basa riba e organisacion di e aparato gubernamental caminda cu Gobierno ta bay redefini e pakete di servicio cu ta desea di ofrece e comunidad di Aruba pa e 15/20 añanan venidero.
E mandatario a indica cu tur e punto nan aki ta forma parti di e ‘framework’ financiero cu na mes momento ta determina den un proyeccion multi-anual pa e añanan proximo, kico ta bay ta e presupuestonan y kico ta bay ta e cuadro financiero di gobierno di Aruba.
Pa esaki sigur mester tene na cuenta cu e gastonan por wordo aloca mas efectivamente y mas eficientemente, pues pa logra esaki mester Gobierno mester indica cua ta e servicionan cu ta desea di ofrece na e comunidad y na cua nivel di calidad pa asina tin claridad riba e forma cu lo ehecuta e presupuestonan y na mes momento permanece dentro di e cuadro financiero cu a proyecta den e añanan proximo.
E obhetivo principal di e bishita aki tabata pa reuni cu e diferente inversionistanan pa informa nan tocante e situacion actual di e finanzas publica di pais Aruba y na mes momento pa nan informa tambe kico nan ta kere lo ta bay ta e desaroyonan riba e mercado di capital den e aña venidero.
Finalmente e mandatario di finanzas a sigura cu e apetit di parti e inversionistanan t’ey sigur pues tin hopi likides ainda den Mercado di capital. Sin embargo Minister Bermudez ta enfatisa cu pa Aruba cu ta un pais chikito cu un economia chikito y un presupuesto relativamente chikito, un negociacion di paketenan grandi manera cu varios di e institutonan financiero aki ta ofrece no ta necesario. “Nos ta purbando di wak cua di e institutonan aki lo ta mas adecuado pa nos den futuro pa nos por haci un apelacion y tambe kico ta e factibilidadnan den Mercado”, e mandatario a expresa.
Expresionnan haci den e articulo aki no necesariamente ta refleha opinion di ArenaPoliti.co