ORANJESTAD - Un comunicado emiti pa US Department of State di Secretario di Estado Americano John Kerry, den nomber di President Obama, ta felicita pueblo di Aruba cu dianan di fiesta relaciona cu 'Dia di Betico'. Esaki ta algo remarcabel, pero loke sin duda ta mas remarcabel y a hala hopi atencion ta e hecho cu den e comunicado ta elogia Aruba pa den e ultimo añanan ta e forsa principal den guia Caribe pa un futuro di energia limpi. Esaki por ser mira den desaroyo di un di e parkenan solar mas grandi di e region. Den e mesun comunicado e departamento importante aki ta haci mencion di e di seis Green Conference Aruba di 2015 y participacion di Aruba na e Cumbre ‘Caribbean Energy Summit’ na Washington DC y su sosten duna na COP21 na luna di December ultimo na Paris den e acuerdo logra pa combati cambio di clima. Na ambos cumbre importante organisa pa Nacionnan Uni Prome Minister di Aruba Mike Eman a hiba palabra. Esaki no a bay sin wordo nota y manera semper a bisa caba, Aruba ta un key-player riba e tereno aki.

US Departament of State ta confirma esaki den su comunicado loke pa Aruba ta haci un mundo di diferencia. Mas aleu den e comunicado ta poni cu e pasonan tuma door di Aruba ta refleha e compromiso di Aruba pa loke ta sostenibilidad pa logra su meta pa bira completamente independiente di energia fossiel na 2020. Esaki ta un meta cu Gabinete Mike Eman a pone su dilanti desde fin di 2009. Aruba mas y mas ta hayando atencion y reconocimento mundial pa esaki. Aruba y su dedicacion pa proteha medio ambiente y pa tin energia limpi ta cuadra cu su hospitalidad caluroso, su cultura rico, su beachnan bunita cu tur aña ta haya bishita di miyones di turista Mericano.

Na final Secretario Kerry a desea pueblo di Aruba un dia festivo. Miho propaganda pa su meta Aruba no por a haya, biniendo di President di e nacion mas poderoso di mundo, Barack Obama. Esaki danki na e maneho constante y contundente cu gobierno ta hibando riba e tereno aki.

Expresionnan haci den e articulo aki no necesariamente ta refleha opinion di ArenaPoliti.co