E siman aki a inicia tratamento di presupuesto 2016 den parlamento di Aruba. Aunke esaki ta laf atrobe tin un acuerdo y deadline di 31 di Januari 2016 pa por aproba esaki. Den cuadro di esaki tur partido den parlamento por a manda nan preguntanan por escrito cual gobierno mester a contesta bek por escrito. Pero “EMANIPULACION” ta continua y diferente pregunta gobierno NO a contesta of a usa strategia cu lo contesta esakinan durante reunion. Un contesta cu a yama mi atencion relaciona cu pregunta pa ta exacto # 132 riba parkeermeters. Gobierno ta contesta cu “comerciantenan” ta masha contento cu parkeermeters y clientenan awor por para mucho mas cerca di e negoshi y kisas hasta dilanti e negoshi. Gobierno no a splica si con nan a yega na e contesta aki. Nan no a splica si ta un encuesta nan a haci entre e comerciantenan. Nan no a splica cuanto comerciante den Caya Betico Croes y alrededor nan lo por a pasa puntra. Nos ta corda con un comerciante di un restaurant na punta di caya publicamente a splica cu e mester a manda basta empleado cas pa corta den gasto como cu clientela no tabata yega cu e mesun frecuencia mas na su negoshi . Tin pruebanan palbable di lugarnan cu hasta a  cera y bandona Caya Betico Croes despues di introduccion di parkeermeters. Pesey mi kier a comparti un di e contestanan di gobierno awe pa pueblo por mira e seriedad con gobierno ta contesta preguntanan haci door di parlamentarionan. Ta un secreto publico cu e fluo di cliente a baha considerablemente desde a instala  parkeermeters. Kico mas por spera di e gobierno aki? Pueblo keda alerto.

Expresionnan haci den e articulo aki no necesariamente ta refleha opinion di ArenaPoliti.co