ORANJESTAD: Durante tratamento di presupuesto 2016 di pais Aruba, fraccion di MEP a vota contra e amienda presenta pa fraccion di AVP caminda ta pidi pa aloca un suma di 650 mil Florin adicional den presupuesto di Husticia bou di e post “Goederen en Diensten” pa "deskundig advies”. Cu “deskundig advies” ta referi na ayudo of conseho di compania(nan) priva na ministerio di husticia den e ehecucion di campaña di mercadeo. Pues no ta trata aki di un suma aloca directamente den Husticia, ni mucho menos pa cumpra material necesario pa e departamentonan concerni di Husticia. Mas bien e gobierno actual a opta, manera nan ta bin ta haciendo desde inicio, pa aloca un fondo pa propaganda.

Partido MEP no tin problema cu campañanan pa yuda concientisa nos comunidad. Pero pa un campaña surti efecto, e mester sucede na un forma structural y alargo plazo. E amienda presenta pa AVP ta superficial y no ta garantisa ningun di e elemtonan menciona. Nos fraccion ta lamenta cu un biaha mas e gobierno actual no ta tuma siguridad di Aruba na pecho y ta purba pasa Pueblo un fast-ball, creando e percepcion cu e suma aki lo wordo aloca pa combati criminalidad di un forma directo.

E suma di 650 mil Florin aki lo no bay pa cumpra bulletproof vests, ni tampoco pa cumpra uniform, ni mucho menos pa garantisa pa polis cumpli cu nan entrenamento basico manera entre otro "Schieten", pa asina percura pa polis ta miho prepara riba caya. Fraccion di AVP ta purba di tira santo den wowo di Pueblo haciendo como si fuera e placa aki lo bay directamente den e aparato di husticia. Hasta fraccion di AVP ta tribi di tilda MEP di no tin siguridad di Pueblo na pecho. Pero e tristo realidad ta cu un biaha mas AVP ta hunga un wega politico pa nan por tin acceso na placa di Pueblo pa sigui enrikece esnan yega na gobierno.

Ta tristo y berdadero crimen contra Pueblo cu ni 1 florin di e placa aki lo wordo destina pa cumpra material pa brandweer, KIA of CEA. Todo lo contrario! E suma aki lo desaparece den man di un of mas compania priva di mercadeo pa nan “deskundig advies!"

Fraccion di AVP y e gobierno actual, cu nan makinaria di propaganda por purba tira santo den wowo di Pueblo, pero e realidad doloroso ta cu e 650 mil Florin aki, ta destina na sigui traha riba e estetica di e gobierno actual. Bou di ningun circunstancia fraccion di MEP por acepta cu placa di Pueblo cu por y mester a wordo uza den departamentonan di Husticia, ta wordo destina den companianan di mercadeo y no den trece alivio pa loke ta e insiguridad cu ta reina den Pueblo!"

Expresionnan haci den e articulo aki no necesariamente ta refleha opinion di ArenaPoliti.co