Manera ta conoci e minister anterior den gabinete di MEP, encarga entre otro cu Salubridad Publico, esta Candelario – Booshi – Wever, na comienzo di 2006 a muda su Ministerio y algun departamento cu tabata cay bao di su encargo, pa e edificio unda anteriormente e Centro Medico di San Nicolas tabata ubica.
Ya for di e temponan ey e Fundacion CVA, di cua e miembronan tabata encarga nan mes pa guia patientnan cu a yega di haya stroke, y famia di esakinan, tabata den necesidad di un espacio adecua, for di unda lo por a atende e patient y su famia mihor.
Den e añanan ey presidente di e Fundacion tabata sra. Hellen Mohamed, un persona cu tambe a yega di sufri un stroke, y kende pues for di experiencia tabata conoce e necesidadnan di un patient di stroke y di e famia.
No tabata nada straño anto cu sra. Mohamed, por cierto conoci como un persona hopi “mondig”, a tuma e curashi y a acerca Minister Booshi Wever – si mi no ta kiboka riba veld di football na Brazil – cu e peticion, splicando e meta y e situacion di e Fundacion, si e, Booshi, lo por a yuda e Fundacion cu un espacio den e Centro Medico bieu, pues unda e tabatin su Ministerio.
Weitando entre otro cu e Fundacion y su miembronan tabata traha riba un base voluntario, y cu ademas nan no por a “afford” huur di un oficina, Booshi no a duda ningun momento, y e dia siguiente mes ela duna instruccion na su personal pa ta prepara pa yuda sra. Mohamed unda cu esaki lo por tabata necesario.
Esaki di berdad tabata un alivio pa e Fundacion, aunke e miembronan mes a sigui traha sin pago, pero si cu e gastonan cu un asistencia of guia asina ta trece cu ne; pensa por ehempel riba e transporte cu e miembronan mester a cubri for di nan propio saco sin ser restitui pa esey; of e oranan cu nan ta hinca den guia e patientnan y nan famia, sin entrada!

Den curso di añanan hopi informacion por a ser acumula, hopi material a ser produci, y ta bastante documentacion a mira luz di dia.
Hopi patient, y hopi famia di e patientnan aki, a ricibi bon ayudo y guia di e Fundacion.

P'esey tambe tabata un baño frieu, ora cu riba diabierna, dia 26 di februari ultimo, sra. Hellen Mohamed a haya un yamada di un persona di Asuntonan Social kende a informa sra. Mohamed cu riba instruccion di Infrateam e espacio mester ser entrega back per dia 1 di maart; esaki tabata kier meen pues cu pa dialuna, dia 29 di februari, e espacio mester tabata bashi!!!
Tur esaki SIN cu e Fundacion a wordo ofreci NINGUN alternativa unda pa bay!!

Sra. Mohamed cu ayudo di algun amigo a logra saca e materialnan, documentacion y filenan pa hiba esakinan na su propio cas, te cu e lo por haya un ubicacion apropia.
Hecho ta cu sra. Mohamed y e Fundacion no tin ningun caminda pa cana pa anula e instruccion. Hecho ta tambe cu esun cu a tuma e decision - Infrateam of minister? - pa saca e Fundacion for di e local den e Centro Medico anterior, no tin ni e menor idea - geen flauw benul - di e importancia di e trabao di e Fundacion. Sino, por lo menos lo ela duna instruccion tambe pa (laga) busca un otro alternativa pa e Fundacion, y sigur NO saca nan di un dia pa otro!
Aunke nan halanan a wordo corta, e Fundacion ta sigui trata na duna e servicio na e (ex-) patientnan y nan famia di e mihor manera posibel, aunke esey lo por kier meen cu nan lo mester bishita e patientnan y nan famia cas pa cas, cu tur su consecuencia entorno horario, gastonan di transportacion, cu lo mester wordo cubri for di e propio saconan di e miembronan.

Ohala cu e minister di Salubridad tuma e pasonan necesario pa e Fundacion por haya un espacio nobo, for di unda nan lo por atende e patientnan y nan famia. E Fundacion y su miembronan ta para cla pa sigui cu nan trabao VOLUNTARIO; un ayudo di gobierno y di minister Schwengle lo ser aprecia altamente.

Remigio A. R. Wever, 42.10.01.44
Savaneta 120  

Expresionnan haci den e articulo aki no necesariamente ta refleha opinion di ArenaPoliti.co