Gabinete Mike Eman II ta consciente di e balor grandi cu un bon relacion di trabou entre sector publico y priva tin pa cu e progreso di nos isla. Teniendo esey den mente, a percura pa sinta constantemente cu representantenan di sector comercial, specialmente prome y durante ehecucion di proyecto di renobacion di Caya Principal y centro di ciudad.

Adicionalmente, a apunta un persona cu su tarea exclusivo ta pa bishita e diferente negoshantenan y haya e feed back necesario pa cosnan cana di e miho manera posibel. E persona ey ta Ricky Harms. Awo cu e renobacion di Caya G.F. Betico Croes ta practicamente cla den su totalidad, e trabou no ta finalisa.

Ta sigui cu otro fasenan di e vision di Gabinete Mike Eman manera ta e mehoracion di cayanan chikito rond di Caya Principal y e establecimento di BID, esta e Business Improvement District. Esun ultimo aki ta encarga cu mantencion y promocion, entre otro di Caya Principal.

Harms ta admiti cu no tabata facil pa habri wowo di e comerciantenan riba e plannan cu Gobierno a disena pa nos isla su renobacion. E ta kere cu e skeptiscimo di e sector tabata basa riba e decepcion biba cu gobiernonan anterior, nan falta di atencion pa comercio y e añanan di negligencia cu a laga Caya G.F. Betico Croes den un estado deplorabel.

“Obviamente awo e ta moviendo,” asina Harms a indica. El a duna un bon ehempel cu e caso di tienda Mango. Propietarionan no solamente a renoba e local, pero a amplia esaki cu dos piso adicional pa ofrece un variedad hopi mas amplio y digno di cualkier metropolis. “E ta duna bo un sentimento di orguyo,” e funcionario a bisa.

Na su opinion, esaki ta lanta e calidad di e producto pa pueblo y naturalmente tambe pa nos bishitante. “No tin duda cu ta bay tin un domino effect. Bo ta sinti cu comerciantenan ta cuminsa haya e durf. Un ta wak e cu e otro a cuminsa renoba, e otro tambe kier hacie,” Harms a comenta. Prome cu Mango tabatin e renobacion di entre otro Penha y e local actual di Aldo Shoes. Otro cu ta den pleno reconstruccion ta Aruba Trading Company y edificio di Ecco.

Expresionnan haci den e articulo aki no necesariamente ta refleha opinion di ArenaPoliti.co