Tumando nota di e publicacionnan di Banco Central por bisa cu e dos indicadornan mas uza y cu ta papia mas riba nan ta Deficit financiero di Gobierno, cu ta un resultado di su operacion financiero, y e Debe di pais Aruba. E dos indicadornan aki ta e indicadornan mas simpel cu por wordo uza pa haya un bista con finansas publico di pais Aruba ta desaroyando.

Por tuma nota cu aña 2015 a finalisa atrobe cu un Deficit financiero di 201.7 miyon florin. Esaki ta e resultado ora gobierno a logra un entrada di 1,202.5 miyon florin, pero a gasta 1,373.2 miyon florin pues a gasta y mester paga mas na debe cu el a genera na entrada y esaki ta wordo yama e ora un Deficit. Den e tabel adhunto por observa desde 2012 te cu 2015 con cada biaha ta registra deficit y por menciona tambe cu ta desde aña 2008 cu Aruba a experencia un surplus ultimo. Por bisa e ora cu e gobierno actual aki desde su gobernacion no a logra un resultado positivo entre entrada y gasto (surplus) pa pais Aruba ainda den su trayectoria di gobernacion. Alcontrario, por bisa cu e nivelnan di deficit registra pa e gobierno aki ta casi nunca antes bisto desde existencia di pais Aruba. Ora un pais tin mas gasto y cosnan di paga cu e ta genera na entrada, e ora logicamente mester fia pa paga e diferencianan negativo aki, mescos den un hogar. Pues cada aña cu no por logra un balansa entre gasto y entrada, esaki ta contribui na e Debe nacional di pais Aruba. Den e siguiente tabel por observa con e debe di Aruba a crece desde 2012 pa 2015. Aña 2015 a cera cu un Debe di 3,974.1 miyon florin mientras na aña 2012 esaki tawata 3,067.8 miyon florin. Pues por bisa cu den 3 aña di tempo e gobierno aki a hinca Aruba den 906.3 miyon florin extra di debe y esaki ta representa segun CAFT 81.9% di Aruba su GDP. Na aña 2012 e Debe tawata 67.7% di Aruba su GDP y na 2008 esaki tawata 41.7%. Awe por wak cu den corto tempo Aruba su debe a wordo redobla.

Na 2015 Gobierno a introduci VAS, na unda mester paga belasting adelanta riba ganashi cu companianan lo bay gana na 2016 den 2015 caba. Esaki cu e meta pa caha di gobierno logra mas na enrtada. E accion aki conhunto cu e campaña di cobra belasting atrasa a haci cu e Deficit di gobierno na 2015 tawata 201.7 miyon. E tipo di campañanan aki segun CAFT mes no ta solucionnan structural pa un mihor maneho di finansas publico.

E conclusion y alegria di e gobierno actual ta cu e resultado di Deficit na final di 2015 ta menos malo cu normal nan resultadonan sa ta y nan kier convence pueblo cu ta bon noticia tin pa comparti. Sinembargo no por bisa cu paso e resultado di deficit ta menos malo cu prome, cu esaki ta haci cu diripiente nan a demostra cu nan a maneha finansas publico di pais na forma optimal. Adelanto den resultadonan den finansas publico mas bien ta ora cu tin mihor balansa entre gasto y entrada cu por resulta den surplus of break even por lo menos.  Esey lo demostra di ta un adelanto!

Expresionnan haci den e articulo aki no necesariamente ta refleha opinion di ArenaPoliti.co