Prome Minister Mike Eman a elogia trayectoria di Su Excelencia Gobernador Fredis Refunjol: “Aruba lo keda pa semper cu gratitud pa e servicio pa nos pais”
ORANJESTAD – Diabierna mainta Bestuurskantoor a bisti di fiesta pa celebra e hubileo di 30 aña di Status Aparte y 40 aña di Himno y Bandera. E ceremonia protocolario tradicional y desfile nacional cu a sigui a keda presencia pa un grupo grandi di ciudadano y bishitantenan. Tambe henter Aruba por a sigui esaki riba transmision en bibo di Tele Aruba. Durante e ceremonia Minister Mike Eman, a hiba un tremendo discurso como Prome Minister di pais Aruba.
E ceremonia protocolario pa un hubileo di e importancia aki naturalmente ta reuni mandatarionan di paisnan bisiña y amigo den nos region. Diabierna mainta Aruba a keda honra cu presencia di Su Excelencia Gobernador di St. Maarten Sr. Eugene Holiday y señora y Su Excelencia Gobernador di Corsou Lucille George-Wout y esposo.
Discurso di Premier Eman a inicia dunando atencion special na Su Excelencia Gobernador di Aruba, Fredis Refunjol como cu esaki ta su ultimo biaha na e ceremonia, den e funcion aki. Minister President a relata con el a wordo yama na oficina di Ex-Prome Minister Oduber pa, como lider di oposicion, duna su apoyo na e nominacion di Refunjol. Tabata pa prome biaha den historia cu un candidato for di sector politico tabata wordo nomina.
Prome Minister a considera cu sr. Refunjol a sirbi cu orguyo y dignidad pueblo di Aruba como miembro di Parlamento y tambe den Gobierno como Minister. “No tin nada den su trayectoria, ni politico, ni personal cu por a pone mi duda den e capacidad, integridad y pasion di e personalidad di Fredis Refunjol,” asina Premier Eman a comenta.
E mandatario a relata den su discurso cu pesey mes, ora el a bira Prome Minister di Aruba, el a prolonga su posicion como Gobernador tambe. “Masha danki pa bo servicio y sigur Aruba lo keda pa semper cu gratitud pa e servicio aki pa nos pais," Premier Eman a finalisa bisando y pidiendo un aplauso fuerte pa su persona.
Un bes cu a cumpli cu protocol pa cu yegada di mandatarionan, e presentacionnan a cuminsa. Ademas di discurso di Minister di Cultura Otmar Oduber y Prome Minister Mike Eman, Ex-Vice Prome Minister Brinkhorst di Hulanda tambe a hiba palabra caminda a elogia y felicita nos pais.
E parti artistico di e mainta a deleita un y tur pa su nificacion y bunitesa. Ademas di canto di Coro 1976 dirigi pa Sra. Maybeline Arends-Croes y compaña pa musica di Orkesta Sinfonico dirigi pa Sr. Jesus ‘Joy’ Kock, e ceremonia a clausura cu un produccion estupendo den man di bailarinnan hoben dirigi pa Sr. Freddy Tromp.
Expresionnan haci den e articulo aki no necesariamente ta refleha opinion di ArenaPoliti.co