Oranjestad: "Ta di lamenta cu un biaha mas mester constata cu den transcurso di e siman tras di lomba, un racha di atraco a tuma luga riba Aruba. Antisocialnan a kibra y drenta den cas di cuidadanonan indefenso y hasta a bira asina creativo y a trata di engaña Pueblo cu nan ta miembro di Cuerpo Policial pa asina comete nan fechorianan.

Pa partido MEP awa a pasa hariña masha tempo! Ta incomprendibel cu ta goberna pa mas di 6 aña sin un maneho concreto riba tereno di prevencion di criminalidad. Tur esfuerso ta concentra riba e aspecto represivo, pues ora cu baca a hoga caba!

Siman pasa partido MEP a elabora extensamente riba e asina yama "Panic Button" (Boton di Panico) como un alternativa concreto den e esfuerso pa preveni y combati criminalidad. E sistema aki ta un sistema fasil y efectivo, caminda e persona cu tin e aparato, djis cu primi e boton, por haya asistencia inmediato di autoridad.

E siman aki nos Fraccion ta concentra riba e situacion di e departamento di "Guarda Nos Costa" (GNC). Nos Fraccion ta totalmente convenci cu algo mester sucede cu e costanan di Aruba. Y den cuadro di esaki, un departamento manera GNC lo por ta un instrumento importante pa por contribui na restablece e sentimento di trankilidad den Pueblo. E costanan di nos Isla ta keda un problema grandisimo. Nos frontera ta hancho habri pa actividadnan criminal, manera importacion di arma di candela y droga. Ultimo tempo nos ta constata cu cada biaha cu un atraco tuma lugar, arma di candela ta envolvi. Tambe no mucho tempo pasa tabata tin un racha di robo di koper na varios scol y establecimiento. E koper aki no a keda Aruba y tabata wordo manda via canalnan ilegal for di Aruba.

Partido MEP no ta contento cu e falta di maneho den Husticia y ta pa es motibo aki nos a urgi e Prome Minister di Aruba tanto na December di 2015 como na Januari 2016, pa e tuma e pasonan necesario pa nos comunidad tin un persona cu realmente por cumpli cu e tareanan cu Pueblo ta spera di dje, paso pa loke ta trata siguridad y trankilidad di nos Pais, solo mester cuminsa sali pa un y tur!"

Expresionnan haci den e articulo aki no necesariamente ta refleha opinion di ArenaPoliti.co