ORANJESTAD – Lider di MEP Evelyn Wever-Croes durante conferencia di prensa a duna un relato di su biahe reciente pa Hulanda, den cual e tema di nombracion di e gobernador nobo pa Aruba tambe a bin padilanti.

Lider di MEP a reitera locual el’a bisa na Aruba prome cu el’a bai. “Tin un procedura pa wordo encamina na momento cu ta trata di un nombracion asina importante manera Gobernador di Aruba. Y parti di e procedura ta pa trata e nombracion cu discrecia maximo y pa busca sosten mas amplio posibel, pasobra ta un funcion cu mester ta ariba cualquier discusion politico.

Tempo cu a nombra sr. Freddis Refunjol, ex prome minister Nelson Oduber a encamina e caminda, cu a resulta uno exitoso. Den esey a busca sosten serca lider di oposicion tambe, y mirando e cualidades di sr Refunjol, henter Aruba, simpatisante y oponente, a duna su sosten.

Ohala cu esey ta e caso e biaha aki tambe cu e proposicion cu Mike Eman tin cu duna, pasobra nos tur por a mira con importante e funcion aki a bira, y dicon ta asina importante pa tin un persona integro y capas pa ocupa e function di Gobernador di Aruba. Y lo no ta facil pa haya un persona cu tur e cualidades di sr. Refunjol.

Mi ta lamenta cu gobierno di Aruba no ta respeta esaki, y ya a cuminsa tira cantidad di nomber den laira, cu hasta a pone Hulanda reacciona mesora y bisa cu nan no kier entre otro Angel Bermudez como gobernador. Esaki no ta yuda e proceso, es mas, ta pone cara di Aruba na berguensa. Nos mester a evita esaki, y pesey mi ta bisa, tanten cu Mike Eman no cana e caminda indica, e no ta conta cu sosten di fraccion di MEP. Esaki mi a ripiti tambe durante mi reunion cu sr. van Zwol, secretario general di asuntonan di Reino, na Hulanda” segun Evelyn Wever-Croes, lider di MEP.

Expresionnan haci den e articulo aki no necesariamente ta refleha opinion di ArenaPoliti.co