Gabinete ME II: Construccion di 'Smart Community Aruba' ta cuminsa
ORANJESTAD - Despues di preparacionnan extenso, construccion di e bario na Kibaima cu ta consisti di viviendanan innovador y sostenibel, 'Smart Community Aruba' a haya e señal pa start. Na Kibaima, e trabounan a cuminsa dialuna merdia den presencia di Prome Minister Mike Eman, Minister Benny Sevinger, Mike de Meza y directonan di FCCA y Caribbean Branch Office TNO, van Poppel y Ebbing cu ta bay guia e proceso di cerca. Presente tabata tambe directornan di ELMAR NV, WEB NV, ehecutivonan di SETAR, FCCA y un cantidad grandi di invitado.
'Smart Community Aruba', ta bira un proyecto experimental di 20 cas cu enfoke riba sostenibilidad. E bisindario ta bira un medio unda por desaroya, investiga, studia y bin cu solucionnan sostenibel basa riba condicionnan climatologico Caribense. E meta primordial ta desaroyo di conocemento relaciona cu solucionnan tecnologico di escala y modelonan comercial cu despues por wordo aplica riba henter Aruba y regionalmente.
Areanan di investigacion specifico ta: tecnologianan pa vivienda cu ta spaar energia, produccion descentralisa di energia solar y di biento, integracion di energia sostenibel den rednan electrico inteligente (Smart Grids), tratamento y reciclahe di awa y transporte (auto) electrico pa consumidor. Tambe ta bay tin un enfoke special riba e aspectonan humano relaciona cu tecnologia sostenibel.
Partnernan cu ta forma parti di e consorcio aki ta: Pais Aruba, FCCA, Utilities Aruba NV, WEB Aruba NV, NV ELMAR, SETAR NV y Caribbean Branch Office TNO. 'Smart Community Aruba' ta bay ofrece tambe un 'Open Innovation Platform' na compania y institutonan di investigacion local y internacional cu kier test nan innovacionnan y establece nan mes na Aruba. Pa Aruba esey ta nifica un estimulo pa desaroyo di un di tres pilar economico.
Construccion di e bario innovativo aki ta bay tuma un periodo di mas o menos 11 luna. durante e periodo aki FCCA ta bay busca y selecta huurdonan basa riba un perfil specifico cu a wordo desaroya pa e proyecto. Nan no mester unicamente di kier biba 'green', pero tambe mester ta dispuesto pa coopera cu e investigacion t estudionan en general.
Director di FCCA van Poppel, kende a haya masha hopi elogio di cada orador, a bisa den su discurso cu TNO y pais Aruba ta e inventornan di 'Smart Community Aruna'. "E enfoke ta con biba den forman sostenibel."
Jan Ebbing di Caribbean Brabcho Office: "E comunidad aki 'SCA' ta un flagship nobo banda di Turismo."
Minister de Meza tabata corto. El a enfatisa cu esaki ta un proyecto importante pa Aruba. "Nos ciudadanonan ta bay biba den dje y experencia tur loke tecnologia moderno tin di brinda."
Minister di Infrastructura Sevinger a cuminsa na bisa cu e proyecto a tarda un poco pa cuminsa, pesey esey ta semper e caso cu tur loke ta bon. "Aki 11 luna nos ta para bek akinan pa tuma yabi di e prome cas".
Prome Minister Mike Eman, kende ta iniciado di e proyecto y vision 2020 a splica cu e proyecto ta uno innovado y progresivo. "Mester di curashi y balentia pa inicia un proyecto manera esaki y esey ta FCCA a demostra. Curashi y balentia." Premier Eman a gradici TNO y tur otro partner envolvi den e proyecto.
Expresionnan haci den e articulo aki no necesariamente ta refleha opinion di ArenaPoliti.co