Gabinete ME II: Prome Minister Eman a hiba palabra den Asamblea General di Nacionnan Uni
Den nomber di Reino Hulandes
NEW YORK/ORANJESTAD - Prome cu el a cuminsa cu su discurso elocuente den sala di Nacionnan Uni na New York den nomber di Reino Hulandes, Prome Minister Eman a splica su audiencia di e cuatro paisnan di cual Reino Hulandes ta consisti y di e relacion special cu tin cu e tres islanan cu awe ta parti di municipio Hulandes. Su discurso dirigi riba Agenda 2030, cu ta e tema di e asamblea, a toca e puntonan principal cu mundo mester atene su mes na nan.
"Algun tempo pasa nos tabata para aki ora cu nos a wordo profundamente toca na momento cu Papa Fransisco a enfatisa esencia moral tras di e Metanan pa Desaroyo Sostenibel (SDG) cu nos a caba di adopta. Su palabranan a simbolisa cu agenda 2030 ta mas cu un programa institucional. El a bira un tarea pa humanidad pa crea un miho mundo y pasa esaki pa e siguiente generacion. Un tarea cu un responsabilidad grandi. Ta pesey cu un enfoke grandi riba inclusividad y sostenibilidad ta e yabi pa implementacion di Agenda 2030." Eman tabata hopi enfatico ora el a splica cu pa algun di e paisnan den sala y sigur pa nacionnan isleño manera Aruba, esaki ta un asunto di sobrevivencia inmediato. Pero pa tur pais, e ta un asunto di sobrevivencia a termino largo.
Pa Reino Hulandes 'tur hende ta conta' ta central:
- Inigualdad halto ta wordo reconoci di ta un obstaculo mayor den logra e Metanan di Desaroyo Sostenibel.
- Esaki ta motibo pa institucionnan fuerte percura pa esnan mas pober y gruponan marginalisa tin oportunidad pa participa completamente den economia y sociedad ya cu nan ta esnan cu tin mas bentaha di crecemento.
- Duna e ser femenino mas poder ta e enfoke mayor den politicanan di cooperacion internacional.
- Si tin un trabou ta e ruta principal pa sali di probresa, e prome prioridad ta cu mester crea trabounan sostenibel y decente den paisnan den desaroyo mescos cuida negoshi y inversion, tambe den pasinan fragil cu tabata den conflicto.
- Reino Hulandes ta sostene nan yamada fuertemente pa den forma urgente pone atencion na e forma no-sostenibel con ta usa e ecosistema di awa.
- E cifranan alarmante di desasternan relaciona cu awa ta algo cu no por wordo ignora. Nos mester actua awor y lihe ya cu nos a yega na fin di e caminda.
- Pa acelera e transformacion aki, Secretario General di Nacionnan Uni, Ban Ki-Moon y Presidente di Banco Mundial Jim Kim a yega na un convenio di Nivel Halto riba awa. Prome Minister di Hulanda Rutte ta miembro di e Panel aki loke ta un honor, con den un bon forma desaroya y maneha fuentenan di awa y promove servicionan di awa y servicionan sanitario.
- Reino Hulandes tambe lo sigui cu su esfuersonan di hopi aña pa construi capacidadnan den paisnan cu ta partner y rond mundo pa maneho sostenibel di awa.
- Otro luna na Rotterdam nos lo organisa un encuentro di e Delta Coalition, consistiendo awor di nuebe pais, pero habri pa otronan cu kier join.
Expresionnan haci den e articulo aki no necesariamente ta refleha opinion di ArenaPoliti.co