Evelyn Wever-Croes ta invita Otmar Oduber pa demostra. 

STA. CRUZ --  Lider di MEP Evelyn Wever-Croes a tuma nota di un articulo di minister Otmar Oduber den cual e minister na un forma masha baho mes kier debate tocante e ley di ‘all inclusive”. Segun e minister ami como lider di MEP no a defini mi posicion ainda entorno di e ley aki, y pesey e minister ta haya ta bon pa lastrami y insultami. Locual cu e minister aki ta perde for di bista ta cu ami ta un persona cu ta tuma mi trabou di parlamentario hopi na serio, y mi no ta sucumbi pa presion di ningun hende, sigur no di Otmar Oduber. 

TRABOU DI PARLAMENTARIO TA EXIGI PREPARACION DEBIDO 
Pa por compronde e ley aki mihor, y especialmente mirando cuanto resistencia tin den e ley aki, hunto cu mi fraccion mi ta reuniendo cu varios organisacion y departamento, prome cu fiha un posicion.Otmar Oduber a tene e ley aki den su lachi mas 6 luna despues cu e conseho devastador di Raad van Advies a wordo duna, y awor e tin ansha y kier pone presion riba MEP? Otmar Oduber ta bon equiboca si e ta kere cu su insulto y atakenan ta logra algo. Ta pasobra Otmar Oduber a hasi asina un mal trabou cu nos turismo e tin nos den e problema aki awor. MEP kier ta bon prepara na momento di drenta e debate den Parlamento, mirando e seriedad di e asunto aki.

CONSEHO HURIDICO DEVASTADOR CONTRA OTMAR ODUBER 
Pa ami como hurista ta hopi importante cu Raad van Advies a duna un conseho asina devastador contra e ley di Otmar Oduber. Mi por compronde cu pa Otmar Oduber conseho huridico no ta importante, pasobra mas di un biaha a keda  sin respeta esaki. Ami ta un persona cu ta tuma mi trabou na serio, y nos mester explora tur posibilidad den e caso aki, especialmente mirando e conseho devastador di Raad van Advies. 

ATAKE Y INTIMIDACION DI OTMAR ODUBER 
Si Otmar Oduber ta kere cu door di bai hincami den stoma di trahadornan di hotel e por intimida mi, e ta mal equiboca atrobe. Otmar Oduber ta biba den un mundo di abuso y intimidacion. E cosnan ey no ta hasi ningun impresion riba mi. Ami tin interes di Aruba na pecho, pesey mi no por compronde con Otmar Oduber por declara cu e ta contra mas“all inclusive” pero den e ley aki e mes ta crea espacio pa 1500 kamber “all inclusive” mas. Ta pa esnan cu ya el’a hasi compromiso cu nan caba? Ken ta contra interes di Aruba awor? Si bo ta haya “all inclusive” asina malo, dicon bo kier bin cu 1500 camber mas?

NI CARNI NI PISCA 
Otmar Oduber, abo mustra pueblo awor: bo ta carni of bo ta pisca? Bo ta contra mas “all inclusive” of no? Y de paso lo ta bon pa e minister mustra tambe su posicion pa loke a pasa siman pasa den Parlamento: Otmar Oduber, abo ta acepta abuso contra hende muher? Bo ta carni of pisca? Bo silencio ta duna e impresion cu bo tambe ta aproba e abuso, mescos cu bo lider Mike Eman!

Expresionnan haci den e articulo aki no necesariamente ta refleha opinion di ArenaPoliti.co