Punto di bista di Gobierno segun Minister President Mike Eman 

ORANJESTAD – Compartiendo su opinion riba loke ta e debate actual tocante e tema di All Inclusive, Prome Minister Mike Eman a duna di conoce cu e ta considera logico cu propietarionan di hotel ta mira pa nan ganashi y operacion, pero Gobierno su responsabilidad ta pa wak pa interes general, incluyendo un industria turistico husto. Maneho di pais Aruba ta inclui stakeholders den comercio tin espacio pa traha y, di otro banda, ta percura pa e rendimento ta uno cu ta yega den cada bario.

“Un hotel cu ta All Inclusive den un balansa cu hopi otro hotel cu no ta All Inclusive ta sano, pero si demasiado hotel bira All Inclusive, bo ta bay haya cu e impacto economico cu nos ta buscando pa refleha den nos comunidad, den nos comercio, den nos trahadonan, den nos taxista, ta reduciendo y esey nos no kier y pa e motibo ey un regulacion ta hopi importante,” asina Minister President a comenta e siman aki.

E prome mandatario ta kere cu e discusion cu a bin a rais di e ley cu Minister di Turismo Otmar Oduber y Minister di Salud, Alex Schwengle a traha, ta uno sano. “Nos ta spera cu e dialogo cu Minister di Turismo ta den dje cu AHATA y tur otro hotelnan y stakeholders, por yega na algo cu na final nos tur ta di acuerdo riba dje.  Pero laga mi ta bon cla cu e punto di bista di Gobierno ta cu e industria di turismo mester tin rendimento pa henter nos comunidad, no unicamente pa e operacion di e hotel.”

Sector hotelero y turistico en general mester tin, segun Premier Eman, un rendimento pa nos restaurantnan, pa nos tiendanan, pa esnan cu ta den tour operators  y mester tin rendimento pa henter nos comunidad. E ta kere cu un pais caminda tur hotel ta All Inclusive ta reduci dramaticamente e rendimento di e pais y esey Gabinete Mike Eman no kier.

Expresionnan haci den e articulo aki no necesariamente ta refleha opinion di ArenaPoliti.co