Triumvirato a haci entrega di un rapport cu conseho na Gobierno di Aruba 

Despues di un estudio haci pa expertonan nombra den un triumverato, a ricibi e Conseho triumviraat 2016 for di man di e miembronan Edwin Tromp, Robert Jeandor, Edwina Werleman, Glen Penniston y Robert Maduro. Ta asina cu mesora despues di Carnaval Minister Otmar Oduber a instala un comision bou di presidencia di Sr. Edwin Tromp cu un tarea haci un inventarisacion cu un bista riba e interes di musiconan y di Gobierno. Riba peticion di e mandatario encarga cu cultura ta buscando un forma pa logra un maneho general di musiconan cu lo representa un etapa nobo den e pensamento pa yega na un tipo di Asociacion di Musico. Esaki pa evita discusionnan manera nos a mira den pasado. E comision na su turno a traha un conseho obhetivo pa Gobierno, di locual nan a constata cu ta biba entre e musiconan.  

Ta buscando un bon relacion entre musico, artista y gobierno riba diferente tereno. Manera entre otro posicion huridico di e musiconan, oportunidad pa toca durante eventonan di artistanan internacional y e formacion di un organo central pa representa e musiconan.

Minister Oduber ta mira e miembronan di triumverato como personanan cu ta carga hopi respet den nos comunidad. Ta trata di nombernan cu a keda postula pa Stichting Musica for di tempo di Sr. Hildward Croes (q.e.p.d.) y a continua bou di Sr. Clyde Burke, pa e investigacionnan keda conduci.

Awor despues di 2 pa 3 luna cu e comision a haci su inventarisacion y investigacion, a papia cu diferente organisacionnan tambe gruponan unda a yega na un conseho cu a keda presenta na Gobierno di Aruba. E comision a presenta e recomendacion na Conseho di Minister pa Sr. Oduber ratifica esaki. Intencion tambe ta crea un relacion habri cu Gobierno di Aruba mirando cu hunto lo mester traha na bienestar di e musiconan y artistanan riba nos isla.  Ta varios Minister ta envolvi mirando cu por ehempel Minister di Labor ta esun cu lo ta envolvi pa locual ta trata contractnan laboral di musiconan, Minister di Integracion y Minister di asuntonan general ta esnan cu lo mester otorga permiso na momento cu tin mester manera den caso di conciertonan di afo percurando pa e balansa entre bandanan local cu artistanan internacional. Mencionando e diferente ehempel nan aki ta obvio cu tin hopi aspecto cu ta regarda derechonan di musico riba nos isla y cu tin diferente Minister envolvi.

Diasabra dia 11 di Juni na Piedra Plat Entertainment Center pa 1or di merdia, ta bay tin un encuentro cu musiconan pa splica mas detaya henter e concepto y mira si ta yega na un etapa nobo den representacion pa musiconan riba nos isla.

Expresionnan haci den e articulo aki no necesariamente ta refleha opinion di ArenaPoliti.co