Minister Oduber satisfecho cu reunion sumamente positivo cu bondnan di Taxi 

Diaranson mainta Minister Otmar Oduber a reuni cu tur bond di Taxi pa aclaria henter e mal interpretacion cu tin riba e MB publica e siman pasa pero na mes momento e Minister a probecha pa aclaria tambe insinuacionnan haci publicamente sosteni pa un periodista "Speed"Andrade y den e caso aki Sr. Dangui Oduber cu na nan turno a fomenta henter un disturbio caminda cu no tin. Sr. Oduber ta sigui splica "Ma puntra tur presente si nan ta para tras di e expresionnan cu mi persona lo a bisa cu nan ta carece di calidad of cu nan ta hende cu no ta di confia...TUR bond, sin excepcion, a confirma cu na ningun momento so a scucha Minister insulta nan. Nan a distancia nan mes di e insinuacionnan aki."
E reunion en general a bay den un hopi bon ambiente. E mandatario encarga cu transporte publico di nos isla ta indica cu a trata cada un representante cu e mesun respet di semper y na un forma transparente a tuma su tempo pa splica e MB y e articulonan relevante di e ley concerni. Punto pa punto a pasa den e MB y mustra cu no tin nada contra ley, ni tampoco den desbentaha di e taxista. "E MB ta nada mas cu un ehecucion di e ley. Locual cu si nos kier haci ta frena e fenomeno di negoshi cu ta tuma luga y abuso nan contra 'hulps chauffeurnan' cu ta tuma luga."
A publica e decreto ministerial pa reenforsa e ley existente y e MB ta completamente den liña. "No ta asina cu un famia no por pasa e permiso pa un yiu, of mas cosnan cu mi por a scucha den e liña ey. De facto net prome cu e reunion ma entrega un yiu di famia su permiso despues cu a haci debido investigacion y cu e ta cumpli cu tur e rekisitonan di ley." Minister Oduber ta mustra riba e hecho cu tur e storianan cu a wordo crea rond di e calumnia di e periodista y Sr. Dangui Oduber no ta cuadra cu realidad.
E taxistanan na nan turno a probecha pa trece dilanti algun inkietud manera entre otro nan cantidad dia nan di vacacion cu nan tin unda lo kier aumenta esaki di 25 dia pa 30 dia pa aña y e mandatario a mustra di no tin ningun problema pa aumenta esaki. Tambe e bondnan di Taxi presente a puntra riba con lo por haci pa reparti dianan di vacacion na luga di mester tuma tur den un solo biaha. "Tabata un protocol den pasado cu nan mes a firma, cu a stipula e maneho cu mester tuma tur e dianan aki den un solo biaha. Ma bisa nan cu di mi banda no tin ningun problema pa reparti esaki den 4 of 5 biaha." asina Sr. Oduber ta comenta.
A trece diferente punto dilanti unda e disponibilidad di ambos tanto e taxistanan como tambe Gobierno di Aruba a bin padilanti y e bon relacion aki lo continua.
Awor ta sigui reunionnan na DTP unda cu na Augustus lo reuni un biaha mas cu Minister Oduber.
Minister Oduber ta indica di a keda satisfecho cu un reunion cu a bay den un bon ambiente y mas cu tur cos den un forma hopi sincero. Na final e mandatario a expresa un biaha mas e gran aprecio cu e tin pa nos taxistanan cu ta keda e embahadornan principal den e industria turistico.

Expresionnan haci den e articulo aki no necesariamente ta refleha opinion di ArenaPoliti.co