Por cierto dialuna e tres mandatarionan di e ‘CITGO/PDVSA-deal’ tin cu bay informa e parlamento ‘Duna pabien sin wak un documento’ riba e acuerdo aki. Pues parlamento ta yama un reunion riba e asunto dudoso aki, despues cu e acuerdo di 2000 pagina a wordo firma caba pero cu ni un dia gobierno a negocia cu e doño di e refineria prome. Esaki ta zona manera ‘mosterd na de maaltijd’, pero sin ‘maaltijd’. Gobierno a viola y kibra tur sorto di ley local, a falta tur respet pa pueblo, parlamento y e organonan di conseho, a gaña pueblo y parlamento ora e kier a bende e 18 miyon florin cu mester wordo paga na impuesto como ‘un salbacion’ pero en realidad gobierno a regala CITGO 9 miyon florin sin aprobacion y enbes cu parlamento yama un reunion pa atende cu e asuntonan aki serio, parlamento ta yama tres minister pa haya INFORMACION. Dicon parlamento no a uza su armanan Constitucional, pa atende cu e infraccionnan di ley y e falta di respet pa pueblo y parlamento mes? Con serio e reunion aki mester wordo tuma, si ainda ningun hende fuera di gobierno (y e gremio petrolero, Diario, 28 juni 2016), a mira un solo documento di e ‘CITGO/PDVSA-deal’?

Riba 13 di mei, tur fraccion den parlamento a core felicita gobierno cu e ‘gran logro di e reapertura di e refineria’. Diferente parlamentarionan, hasta esunnan drumi, por poco a trompica riba otro den nan afan pa ‘cobra’ un tiki di e ‘logro historico’ aki. No tabata importa e parlamentarionan si nan rol tabata solamente pa carga e pen cu a wordo hiba Venezuela pa firma e acuerdo dudoso. Nan unico interes tabata pa haya un poco di e ‘gloria’, pa asina gaña pueblo cu nan si semper a lucha pa ‘e mehorador’. Cu defacto nan sosten hopi lihe y incondicional pa e ‘CITGO/PDVSA-deal’, ta encera trece mas stranhero pa Aruba, stimula mas ‘Cheap Labor’, hinca pueblo den un otro aventura dudoso biyonario, subi e debe nacional, perhudica futuro generacionnan, regala patrimonio mineral di pueblo, pone tur ‘claim’ ambiental y polucion riba lomba di pueblo enbes riba esunnan cu tabata responsabel y coopera cu algun hende lo bira mas miyonario cu e cobramento di e ‘finder’s fee’, no tabata importante. E parlamentarionan ta convenci cu pueblo lo bolbe trapa den e mesun triki di refineria, cu a wordo uza durante eleccion 2009 y 2013, cu nan por permiti nan mes e luho di duna ‘pabien’ di antemano sin wak un solo documento di e ‘CITGO/PDVSA-deal’.

Ni un dia despues di e firmamento di e ‘CITGO/PDVSA-deal’, e mayoria den e parlamento Venezolano a declara e acuerdo como algo contra ley y como un acto algo ilegal. Cu otro palabra, nos gobernantenan intencionalmente a kibra leynan di un otro pais. E sosten lihe y incondicional cu tur fraccion den parlamento a duna gobierno riba 13 mei 2016, tambe ta haci parlamento culpabel. Pues esunnan prome yama cu mester duna e bon ehempel, awor abiertamente ta violando leynan di otro pais.

E lo ta interesante pa mira si den e reunion di dialuna, ainda tur fraccion ta para tras di nan sosten pa e ‘CITGO/PDVSA-deal’, awor cu internacionalmente ta conoci cu nos gobernantenan intencionalmente a viola leynan Venezolano, pa probecho personal.

(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co