Nos por a hiba nos pueblo na un otro nivel di desaroyo si no tawata pa e mal gobernacion di Gabinete Mike Eman I y II. Si nos wak cu CITGO/PDVSA ta bay inverti $600 Miyon den nos refineria, nos gobierno tambe por a haci esey. Nos por a bay Banco Mundial y presta placa pa inverti den un refineria nacional y despues busca un aliansa strategico manera Venezuela pa nos explota esaki na un manera cu ambos pais lo a beneficia. Nos gobierno a prefera un Green Corridor (un caminda chiripero) pa 800 Miyon florin y ya caba DOW a distancia su mes di e proyecto aki. Varios proyecto di construccion a bay hopi malo e ultimo 7 añanan unda pueblo ta paga DOBEL pa un trabao inferior pa complace e sponsornan di partido AVP. Awo nos tin cu conforma nos mes cu un deal chiripero pa salba e dignidad di nos pueblo. Pasobra nos no por sobrevivi cu un pilar economico so. Awo nos tin cu lucha pa nos tin un bon relacion comercial/politico pa no perhudica nos Autonomia mas aun.

Si nos wak e 300 Miyon cu nos pueblo a perde cu e deal di Hedging na WEB nos por a renoba y hasta traha schoolnan nobo. Nos por a upgrade nos eseñansa cu tecnologia moderno manera e paisnan mas avansa di mundo pero nos a perde saco y cangreu cu e maneho di Gabinete Mike Eman. E unico cos cu e gobierno aki a haci ta papia barbaridad di un di dos y di tres pilar economico despues di 7 aña y ainda no tin nada concreto den esaki.

Si nos wak e debe nacional di pais Aruba nos mester ta un pueblo hopi mas progresivo y desaroya den deporte, arte, medicina, ciencia, bida academico y cultural pa no papia mes di e parti politico. Enbes di gasta placa pa loco y kibra tur ley di bon gobernacion nos por a haci hopi mas pa nos digno pueblo enbes di destrui Caya Betico Croes, caba cu proyectonan na beneficio di nos pueblo manera: E proyecto di dump na Parkietenbos, Expansion di IMSAN, Hospital nobo den centro di Aruba, Turismo medico pa San Nicolas como un sector nobo, un refineria nacional despues di negocia cu e Multinacional na beneficio di nos pueblo pero a scoge full un rumbo ANTI-DEMOCRATICO. Pero Mike y AVP a dicidi di hiba un maneho ANTI-PUEBLO anto awo ta tempo pa cambio di gobernacion pa nos drecha tur locual a wordo daña pa por traha atrobe riba un futuro briyante y prospero pa nos digno pueblo. Solo el pueblo, salva el pueblo.

Expresionnan haci den e articulo aki no necesariamente ta refleha opinion di ArenaPoliti.co