Durante e reunion di dia 1 di September, e Comision di Maneho Monetario (CMM) di Banco Central di Aruba (BCA) a dicidi pa mantene e porcentahe actual di e tasa di e “reserve requirement” na 11 porciento y e “advance rate” na 1 porciento, despues di a evalua e datonan economico y monetario mas recien. E siguiente informacion y analisis a wordo considera den e proceso pa yega na un decision.

Durante e reunion di dia 1 di September, e Comision di Maneho Monetario (CMM) di Banco Central di Aruba (BCA) a dicidi pa mantene e porcentahe actual di e tasa di e “reserve requirement” na 11 porciento y e “advance rate” na 1 porciento, despues di a evalua e datonan economico y monetario mas recien. E siguiente informacion y analisis a wordo considera den e proceso pa yega na un decision.

Reservanan internacional

E reservanan internacional di divisa (incluyendo diferencianan den revaluacion di oro y di reservanan internacional) y e reservanan oficial a mantene nivelnan adecua na fin di Juli 2016. Ambos a registra aumentonan di, respectivamente, Afl. 415,1 miyon (+25,8 porciento) y Afl. 295,1 miyon (+19,9 porciento), compara cu December 2015. Consecuentemente, e reservanan internacional a yega Afl. 2.026,1 miyon na fin di Juli 2016.

Desaroyonan den credito

E total di credito di e banconan comercial a mustra un bahada leve (-0,1 porciento) na final di Juli 2016 compara cu December 2015. Credito na empresa y na consumidor a baha cu 1,0 porciento y 2,7 porciento, respectivamente, mientras cu fiansa pa construccion di cas a aumenta cu 3,1 porciento.  

Inflacion

Na Juli 2016, a registra deflacion den ambos e tasa di inflacion (-1,1 porciento) y e promedio anual di inflacion (-0,8 porciento). E caida den inflacion ta particularmente causa pa un bahada den e tarifa di coriente na Januari 2016 y pa varios caida den e prijs di gasolin cu a cuminsa na e comienso di 2015. E promedio di inflacion ora exclui e componentenan di cuminda y energia a yega 0,5 porciento, primordialmente reflehando aumentonan den e componentenan di recreacion y cultura y vivienda di e CPI.

Turismo

Durante e prome shete lunanan di 2016, indicadornan di turismo a manifesta señalnan mixto, como cu a registra subidanan den e cantidad di turistanan crucero (+17,0 porciento) y anochinan permaneci na Aruba (+0,4 porciento), mientras a nota bahadanan den ingresonan turistico (-4,0 porciento) y den e cantidad di bishitantenan (-0,3 porciento), compara cu e periodo corespondiente na 2015.

Sector Bancario

Na Juli 2016, e cantidad di placa den circulacion a subi cu Afl. 86,2 miyon te na Afl. 4.157,5 miyon, compara cu e luna anterior. Esaki a resulta for di un crecemento den tanto e activo domestico neto como e reserva di divisa neto di, Afl. 79,5 miyon y Afl. 6,7 miyon, respectivamente. Mientras cu e subida den e activo domestico neto a surgi door di un crecemento den tanto credito domestico (+Afl. 48,2 miyon) como transaccionnan no relata na credito (+Afl. 31,4 miyon), e expansion den e reserva di divisa neto di e sector bancario ta debi na compra neto di divisa di Afl. 167,0 miyon door di e banconan comercial for di publico, principalmente asocia cu entrada for di turismo, transferencia neto for di cuentanan den exterior di companianan local, transportacion, y inversion directo. E ultimo expansion a wordo parcialmente mitiga pa benta neto di divisa di Afl. 160,3 miyon e sector bancario na publico. E benta aki ta consisti primordialmente di pagonan neto pa e importacion di bienes, otro servicionan, y otro invercionnan.

Mercado financiero

Na Juli 2016, e tasa di interes a bira menos faborabel pa consumidornan, como cu e promedio di interes riba depositonan nobo a mengua cu 0,1 punto di porcentahe na 1,3 porciento, mientras cu e promedio di interes riba prestamo nobo a aumenta cu 0,5 punto di porcentahe na 7,8 porciento, compara cu e luna anterior. Consecuentemente, e margen di e tasa di interes a subi cu 0,7 punto di porcentahe te na 6,5 porciento.

Advance rate

E determinantenan di e “advance rate” di BCA a keda stabil. E margen entre e “advance rate” di BCA y e “Federal Funds rate” tabata 0,61 punto di porcentahe na Juli 2016. Consecuentemente, no tin un razon pa cambia e “advance rate” di BCA.

Banco Central di Aruba

28 di September 2016

Expresionnan haci den e articulo aki no necesariamente ta refleha opinion di ArenaPoliti.co