Interes di Aruba y trahadornan local mester wordo poni na prome lugar! 

SAN NICOLAS – Lider di MEP Evelyn Wever-Croes hunto cu miembronan di Parlamento Xiomara Ruiz-Maduro, Glenbert Croes y Ady Thijsen, a reuni cu sr Alirio Zambrano, ehecutivo di Citgo na Aruba. 
E reunion a wordo pidi pa e fraccion di MEP pa haya mas informacion di Citgo y pa enfatisa e necesidad pa empleo pa nos cuidadanonan local, y cuido di nos medio ambiente. 

“Nos a haya hopi informacion di e status di trabounan di e refineria, y kiko ta e planificacion di e trabounan. Nos a papia tocante empleo pa nos local nan. Nos a interecambia di opinion tambe tocante medio ambiente, cu nos a wordo sigura cu Citgo lo tene su mes na standardnan halto mericano di medio ambiente. Pa loke ta trata e tema di asbest banda di Fortheuvelstraat, Citgo a informa nos cu esey tabata algo cu Valero y Gobierno a regla cu otro, Citgo mes no tin parti den esey. Nos lo sigi investiga e tema aki, pa haya sa kiko a pasa di berdad y con ta bai soluciona esaki. 

Nos a toca e tema di financiamento di e inversionnan na Aruba, proyecto di gas, y varios tema mas cu ta den discusion den comunidad. Citgo a informa nos cu nan lo cuminsa cu encuentronan den bario pa duna mas informacion. 

Pa loke ta trata nos fraccion, nos a palabra cu esaki lo ta e prome di e reunionnan, pa asina nos keda wordo informa door di Citgo directamente, di con e proyecto ta avansando. 

Nos tabata tin un bon reunion den cual nos a trese nos punto hopi cla padilanti: ARUBA mester sali beneficia. Nos a alerta Citgo tambe pa weganan politico cu gobernantenan di AVP ta purba hasi cu e proyecto. Nos a haya hopi informacion crucial, cu nos lo ta elaborando riba dje den e tempo nos dilanti. 

Importante pa mi bisa awor aki ta cu nos mision ta segura cu e proyecto aki ta exitoso pa Aruba en general, pa nos empleadonan local en particular, y pa habitantenan di e area no wordo afecta. Nos lo sigi den deliberacion habri cu Citgo pa por garantisa e pueblo di Aruba esaki”, lider di MEP Evelyn Wever-Croes a duna di conose. 

Expresionnan haci den e articulo aki no necesariamente ta refleha opinion di ArenaPoliti.co