Durante ceremonia di ponemento di prome piedra na Kunuku Abou   

ORANJESTAD- Minister di Infrastructura Benny Sevinger hunto cu Prome Minister Mike Eman, sr. van Poppel di  FCCA y otronan envolvi tabata presente na Kunuku Abou na e acto oficial di  ponemento di prome piedra di proyecto 'construccion di 18 seniorenwoning' na e sitio ey. Ultimamente FCCA ta trahando duro riba varios proyecto cu ta na bienestar di comunidad, brindando e ciudadano un hogar pa biba aden. Minister Sevinger a menciona presencia di e seniorencomite cu tey pa percura pa interes di e grandinan cu ta bay biba den e casnan cu ta keda cla otro aña na september.

"Un bes mas nos ta para aki na un proyecto riba e lista largo di FCCA. Siman pasa nos a acorda e proyectonan cu FCCA ta bay ehecuta den e proximo lunanan."Sevinger a felicita compania Calidad cu a gana e bidding di e proyecto na Kunuku Abou. El a menciona cu ya caba nan conoce e bon trabou cu Calidad ta haci, asina ta cu e no tin duda cu e proyecto no ta keda dentro di budget y ta keda cla na tempo. Tambe Minister a menciona cu un dia prome nan tabata den Parlamento unda un ley importante a pasa. Minister ta splica kico e ley aki ta encera.  

"For di tempo cu pais Aruba tabata forma parti di Antiyas (eilandgebied) tabatin un discusion entre FCCA y tur gobierno di e tempo ey te awor, riba e tema si FCCA debe gobierno of gobierno debe FCCA. Esaki tabata crea un disturbio pa e bukinan di FCCA pa e por haya fiansa riba mercado internacional cu un interes abou pa asina FCCA por traha mas cas." Sevinger a menciona di tin e grato placer pa anuncia a cu fraccion di AVP a acorda e schikking cu a wordo presenta y a yega na un acuerdo. "FCCA no debe Aruba nada y Aruba no debe FCCA nada. Al contrario. FCCA a haya tur e resto di casnan cu ta di gobierno. Es decir, awor FCCA ta doño di tur e casnan social na Aruba." Minister a felicita sr. van Poppel pa e tremendo trabou y Minister President Eman kende a pusha duro pa esaki por a sosode. No tabata facil, pero a logra keda cla. "Determinacion a prevalece aki nan." 

Expresionnan haci den e articulo aki no necesariamente ta refleha opinion di ArenaPoliti.co