Un comunidad bon educa mester ta un meta comun di nos tur. Na e momentonan aki e cifranan y estadisticanan ta mustra cu e porcentahe di esnan cu un nivel di HBO y WO den nos poblacion di Aruba ta abao. E realidad ta cu nos tin un tarea pa conhuntamente dedica atencion na e educacion di nos pueblo y haci esaki un prioridad. Door di incentiva nos studiantenan pa continua cu un estudio superior pero tambe incentiva nos profesionalnan cu ya caba a termina nan estudio pa bin cas bek no solamente nos lo ta brindando un alivio financiero pa nan por establece nan mes na Aruba sino tambe nos lo ta fortificando nos economia cu conocemento. Den nos programa di gobernacion nos ta papia di e incentivanan aki.

Terminacion di estudio
E ta un realidad cu ora di termina su estudio e hoben ta wordo confronta cu diferente barera cu ta influencia su decision pa regresa Aruba, entre otro e debe grandi pa hopi añanan largo. Den cuadro di esaki nos a delibera y evalua e opcionnan cu MEP tin for di oposicion pa por trece un alivio. Un di e “toolnan” cu un parlamentario tin ta prepara y presenta propuestanan/conceptonan di ley. No ta mucho tempo pasa cu pa medio di un serie di articulo/comunicadonan nos a pone hopi enfasis riba e hecho cu Aruba no ta atractivo pa profesionalnan. Varios punto cu merece atencion a wordo señala relaciona cu nos profesionalnan y studiantenan cu ta inverti asina hopi tempo y placa den nan estudio. E resultado di e evaluacion ta cu pronto fraccion di MEP lo bay presenta na Parlamento un concepto di ley cu lo ta na beneficio di esnan cu ta pagando studiefinanciering y pa e futuro profesional cu djis aki lo termina su estudio y kier establece su mes bek na Aruba.

Deduccion gastonan di estudio
E concepto di ley ta encera deduccion di gastonan di “studiefinanciering” for di bo inkomstenbelasting como “persoonlijke lasten”. Mester enfatisa cu e ley aki lo permiti deduccion di tanto e interes como tambe e suma di aflossing cual ta algo cu sigur lo tin un efecto super formidabel pa e profesional. Pa splica mas, e ley lo haci posibel cu un suma maximo di 10 mil florin por wordo deduci durante un periodo maximo di 10 aña. Remarcabel ta cu e “aftrekpost” aki lo bay conta pa tur esnan cu ta pagando nan fiansa di estudio, sea cu e ta haci cu IBG/DUO, Aruba of cualkier otro institucion financiero. Esnan cu lo bini na remarca pa haci uso di e incentivo aki ta e studiantenan cu termina nan estudio caba, recien graduadonan y profesionalnan cu ya caba ta eherciendo nan trabou den nos mercado laboral. Bo por conclui cu esaki lo ta e incentivo mas atractivo cu Aruba a yega di conoce pa nos profesionalnan.

Pagonan directo
Ademas di esaki nos ta inclina pa continua na busca/ colabora pa por yega na un solucion pa facilita, administra y haci pagonan directo na Duo. E ta un echo cu distancia ta hunga un rol pa por regla cosnan manera debe ser. Manera ta conoci e instancia IBG/DUO ta cobra via deurwaardernan via Corsow cual sigur no ta un proceso mucho eficiente y esaki constantemente ta crea frustracion. Realidad ta cu e administracion di IBG/DUO no ta optimal. Pa e motibo aki nos ta kere cu e profesional mester por tin un mihor bista di kico realmente ta e debe na fiansa di estudio.  

Como un ex studiante, young professional y politico mi ta convenci cu e ley aki ta un estimulo grandi pa nos yiunan di tera. Nos partido lo sigui pone atencion riba e diferente incentivanan cu tin pa nos studiantenan. Pa loke ta trata e concepto di ley mes nos no por imagina cu un politico lo NO bay sostene esaki. Manera menciona na comienso di e articulo aki un comunidad bon educa mester ta un meta comun di nos tur y pesey nos no ta spera nada otro cu un SOSTEN UNANIME di tur 21 parlamentario.

Expresionnan haci den e articulo aki no necesariamente ta refleha opinion di ArenaPoliti.co