“Nos mester di vision, curashi y determinacion pa caba cu criminalidad”    

ORANJESTAD – Den e dianan aki atrobe nos ta wordo azota pa un ola di criminalidad agresivo na Aruba. Lider di MEP Evelyn Wever-Croes a indica un biaha mas cu e problemanan di nos pais ta serio, pero e solucionnan no ta dificil. Nos por surpasa e problemanan, pero nos mester tin un vision bon cla con pa hasi Aruba mas sigur pa tur cuidadano. Nos mester tin determinacion pa actua cu man duro contra criminalnan, y prepara e leynan necesario cu prioridad. Y finalmente nos mester tin curashi pa caba cu abuso. “Mi ta conbensi cu si nos pone un vision cla nos dilanti, nos mustra determinacion y curashi pa combati criminalidad, nos lo logra, pero no cu e gobierno aki, y sigur no cu Minister Dowers” segun lider di MEP.

NOS MES MESTER TUMA SEGURIDAD DEN NOS MAN
“Criminalidad na Aruba ta pasando tur limite. Nos ta den crisis awor. No ban conta mas riba gobierno, ban hasi di nos parti tur lo posibel pa tene nos famia, nos hogar y nos pertenencianan safe. Seguridad ta manera un siboyo: tin diferente ‘casca’ prome cu bo yega na e curason. Asina nos cada un por implementa diferente 'casca' di proteccion: uni cu bisiña pa patruya e bario of traha un grupo di whatsup pa ta den comunicacion cu otro - traha un cura firme y tene e cura sera - pone cacho den cura - sera porta y bentanan - pone alarma na porta y bentanan. Si un di e 'cascanan' faya, tin un sigiente cu ainda ta protehe bo. Ami ta hopi preocupa, y mi ta spera cu Dios cuida abo y bo famia” segun Evelyn Wever-Croes.

SOLUCIONNAN DI MEP
Aparte di loke nos cada un por hasi pa nos mes, Lider di MEP Evelyn Wever-Croes a presenta algun solucion cu MEP ta boga p’e, cu ta demostra e vision, determinacion y curashi. MEP ta propone un plan cu dos paso.
“Paso 1: Nos mester cuminsa cu segura nos costanan pa stop importacion ilegal di hende, arma y droga. Pasobra tanten cu nos no segura nos costanan, nos no por pone orden paden den cas. Con nos ta hasi nos costanan mas sigur? Bin bek cu e radarnan pa vigila e costa manera e radanan chikito tabata funciona. Bin bek cu e helicopter, pasobra awor ora un preso hui, no tin ni helicopter pa buske. Regla e posicion di Warda Nos Costa, duna nan e autoridad y especialmente material pa nan por traha, pa asina nos por controla nos costanan mihor y segura nan.

Una bes paso 1 ta implementa, nos por cuminsa traha na paso 2: pone orden paden den cas. Combati criminalidad cu man duro, sino criminalnan ta tuma over. Nos mester mas polis riba caya, y mester duna departamentonan di husticia material y equipo pa nan funciona. Pasobra e forma con empleadonan di KIA, KPA, Imigracion, CEA, Warda Nos Costa, Brandweer mester eherse nan trabou, ta bergonsoso, y no ta digno di un pais cu ta pretende di ta 5 strea. Hues a bati mahos riba dede di minister di husticia riba e situacion deplorable na KIA. E minister mes ta keto keto riba esaki.Pa trese mas seguridad y trankilidad den e area turistico, mester introdusi ‘tourism police’ specialisa pa opera na un forma cu no ta intimida turista, pero manteniendo orden den area turistico. Esakinan ta apenas algun di nos plannan pa trese bek e seguridad den nos pais. Cu e vision aki, y cu e determinacion y curashi cu MEP semper a demostra pa combati criminalidad, nos lo logra sigur” lider di MEP a finalisa bisando. 

Expresionnan haci den e articulo aki no necesariamente ta refleha opinion di ArenaPoliti.co