San Nicolaas lo bay ta prioridad pa partido POR. Den mi ramo, deporte, no ta un secreto publico cu nada  a wordo haci pa nos deportistanan di pariba di brug. Aki mi no ta referi na solamente edificionan sino na e posibilidad pa brinda e oportunidad na e deportistanan di pueblo di San Nicolas pa practica nan deporte. Manera mi a bin ta ilustrando pa un bon maneho di deporte ta importante pa  prome inventarisa loke tin antes cu cuminsa anuncia cu ta bay traha mas facilidad deportivo. Na San Nicolas tin  facilidad deportivo cu ta bou encargo directo di  gobierno/subsidia door di gobierno ( nr.1 te cu nr.6 ) y facildadnan cu ta priva ( nr.7 te cu nr.11) c uta brinda e siquiente deportenan competitivo y recreativo; 

1. Sport Centrum San Nicolas(SCSN) :  dam, judo, tenis di mesa, jiu-jitsu, hisamento di peso, boxeo y esgrima.  Pa recreacion tin klasnan di Zumba y ehercicio pa 50 +
   Parti mainta diferente scol ta haci uzo di e facilidad pa nan lesnan di gym/deporte.

2. Centro di Bario Lago Heights(CBL) :  softball y baseball.
3. Joe Laveist Ball Park (JLBP);  baseball, tin un  beach volley ball court y posibilidad pa volleyball y bakestball. Club di atletismo ta uza e facilidad aki tambe pero hopi limita.
4. Community Pool (CP); tin landamento recreativo y clubnan di natacion ta uze pa lesnan di natacion. Tambe tin lesnan den awa fitness pa adulto parti mainta y anochi.
5. Gymzaal Prinses Christina (GPC);  volleyball y basketball, varios scol ta uza e sala pa nan les di gym/deporte
6. Tin dos basketball court uno na Village y e otro na Esso Heights (recreation court)
7. YMCA ;  tenis di mesa, arte y musica . tambe volleyball y basketball, scolnan sa uza e facilidad aki tambe pa les di gym/deporte, speeltuin
8. Aruba Golf Club
9. BMX Court na Rooi Hundo
10. Tennis club na Rooi Hundo
11. Diferente veld di baseball y voetball

E problema ta!

Nos por mira cu tin diferente facilidadnan cu diferente disciplina di deporte ta uza pero e facilidadnan aki tin problemanan grandi cu mantenimiento y no ta adecuado suficiente. SCSN pa ultimo 4 aña mester a entrega 3 local na Colegio San Nicolas door cu nan renobando e scol cu e consecuencia cu tin menos espacio pa deporte. E facilidad pafo di basketball/volleyball no tin dak, ta mucho calor den dia y tin molestia serio di paloma. CBL mester mantencion y e speel tuin cu tabatin a bay perdi. JL BP mester drecha  e luga unda tin dak  pa asina e deportenan di indoors por tuma lugar pero aki tambe tin problema serio cu paloma. CP mester wordo manteni miho y GPC despues di hopi aña porfin ta wordo drecha y geverf.

Banda di e parti di facilidad e problema mas grandi ta keda e costo di uzo di e lugarnan aki. Gobierno pa medio di Lotto y aporte directo,a inverti hopi placa pa trahanan pero no a percura pa e mantenimento ni e accesibilidad pa e atleta y e studiante. Pa uzo di algun  facilidadnan  cu ta cay bou di encargo di gobierno of ta wordo subsidia mester paga. E clubnan y federacionnan deportivo no tin e capacidad pa esaki cu e consecuencia cu ta prefera di lague bashi sin uzo cu busca un solucion na unda nan por wordo uza debidamente. Tuma por ehempel natacion escolar. Nan tin cu bay lama pa landa y ora di diploma ta usa CP pasobra nan no por paga pa  e uzo diario eynan. JLBP ta cobra  110 Florin pa uzo di e veld di baseball. Ningun federacion di baseball por pague.

Varios  scol di San Nicolas no tin nan mesun sala di gym of facilidad deportivo y mester comparti e facilidadnan cu tin actual cu no ta suficiente ni completo  pa asina tur scol por uze.

Mi ta puntra pa kico nos ta gasta asina hopi placa destina pa deporte pa traha facilidadnan cu nos no por mantene ni paga pa uza. Nos tin na San Nicolas  10 scol  basico y  9 avansa cu ta conta cu mas di 5000 alumno. Banda di esaki si nos concidera e poblacion di San Nicolas nos por mira cu tin masha hopi usario cu no ta haya e oportunidad pa haci uzo di e failidadnan aki cu nos placa di belasting a paga.

Den luz di esaki e Plata Forma Nobo POR tin atencion debido pa esaki y lo percura pa cambia e situacion aki.  Na corto plaso lo bay drecha tur e facilidanan  y trece cambio unda tin mester y haci nan accesibel pa tur scol, federacion of club. Percura cu lo tin placa prespuesta tur aña pa mantenenan y staff  cu instructornan deportivo cu lo percura cu tin guia adecuado y baha te elimina e drempel di mas grandi e contribucion financiero pa asina tur hende tin e mesun privilegio pa uza nan facilidad.

A largo plaso nos mester sondea e posibilidad pa bin cu un Centro Deportivo Central multi uzo na unda lo tin posibilidad pa atletismo, gimnasio, canchanan cu dak (deporte di paden) y  espacio  pa incorpora arte y musica. Si tabatin mas vision por a uza unda awor aki ta Carnival Village cu ta un lugar central accesibel pa varios scol. Por a hacie multi uzo, conciertonan y actividad caranavalesco por a comparti e facilidad aki. Un cancha di voetbal y atletismo cu por wordo comberti den un concert hall, lo a produci fondonan pa mantene e lugar y por a contribui pa haci San Nicolas un Culture City na unda turistanan ta bin ariba gasta placa den economia di San Nicolas.

Baseball na nivel hubenil mester tin nan mesun facilidad (den luga di a pone dos banda di otro na Pos Chiquito) y mester percura cu nos canchanan di voetbal tin e facilidadnan basico di kleed kamer, baño y luz.

Expresionnan haci den e articulo aki no necesariamente ta refleha opinion di ArenaPoliti.co