Minister Arends: Actividadnan economico limita den areanan residencial
Minister Arends den conferencia a anuncia
ORANJESTAD – Minister di Asuntonan Economico mr. drs. Richard Arends durante un conferencia di prensa dialuna, a haci varios anuncio relata na otorgamento “vestigingsvergunning.” Ademas di moratorio riba establecimento di supermarket y minimarket, a papia tambe di e tipo di negoshinan por establece den un area residencial.
Pa cuminsa, Minister Arends a splica prensa, e linea di Gobierno di Aruba ta pa promove un economia di conocemento haciendo uzo di industrianan clave pa un desaroyo economico sostenibel manera e.o. industrianan creativo, como por ehempel start-ups. Esaki ta nifica cu mester por permiti cierto actividad economico limita den areanan residencial of areanan cu primordialmente ta wordo uza pa vivienda. Despues di consulta haci, a dicidi cu e actividadnan cu lo permiti den areanan cu aworaki Gobierno ta reconoce como areanan residencial ta loke awor nos ta reconoce como profesionnan liber, arkitectonan, etc. Actividadnan of negoshinan cu no ta causa molester pa areanan residencial, manera consultant, actividadnan di servicio personal (cu no tin trahado) manera webdesigner, y actividadnan di cuido. Esaki ta e unico actividadnan cu lo wordo acepta den areanan residencial, cu ta areanan unda cu tin den su mayoria casnan. Obviamente e rekisitonan pa por permiti e actividadnan aki, ta e reglanan vigente di vestigingsveordening y e norma di parkeo, cu ta paralelo na reglanan vigente di DOW,” e mandatario a bisa.
Tambe e mandatario a anuncia, como parti di e maneho di establecimento di negoshi nobo, un lista di actividadnan cu lo no ser permiti den areanan residencial. Pa cuminsa Departamento di Asuntonan Economico lo no duna permiso di establecimento na actividadnan economico ta aparece den e ‘hinderbesluit’. Den e decreto ey tin un lista limitativo di actividadnan y pa e motibo aki lo no permiti dicho actividadnan den areanan residencial. Ademas no ta duna ‘vestigingsvergunning’ den areanan residencial pa establecimentonan cu ta opera como bar, restaurant, club nocturno, supermarket, minimarket, fabrica, junkyard, carwash, negoshi cu ta haci cria of garashi di auto den areanan residencial.
Den cuadro di e ROP existente, Minister di Asuntonan Economico ta haci uzo di cierto cuadro pa por establece un maneho y, dentro di e liñanan di e ROP existente, a dicidi e maneho nobo pa areanan comercial y un maneho nobo pa areanan residencial. Den e di dos categoria lo permiti netamente actividadnan tin di haber cu economia di conocemento. Gabinete Mike Eman II ta convenci cu un economia sostenibel y duradero por ta exitoso si e actividadnan economico, infrastructural y calidad di biba ta den balansa cu otro. Despues di a haci inversionnan cuantioso den nos infrastructura y areanan publico, e maneho di establecimento di negoshi nobo ta contribui na un miho calidad di biba pa e ciudadanonan fortificando asina e base pa un economia sostenibel.
Expresionnan haci den e articulo aki no necesariamente ta refleha opinion di ArenaPoliti.co