Diabierna e acuerdo a keda firma den aula di Universidad di Aruba     

ORANJESTAD - Despues di añanan di preparacionnan profundo Gobierno di Aruba y Universidad di Aruba ta lansa un programa di investigacion y estudio  academico den Ciencia,Tecnologia y Ingenieria (STEM): e Green Faculty. Partner academico den e reto aki ta e universidad di belgo, 'Katholieke Universiteit Leuven (KU Leuven'. Representante di ambos institucion a firma e documentonan diabierna atardi den aula di Universidad di Aruba. E partnership ta pa un periodo di cinco aña. Cu su firma, Prome Minister Mike Eman, ta compromete Gobierno di Aruba pa sostene como facilitador y partner financiero Green Faculty.

Di acuerdo cu Reuters, KU Leuven ta e universidad mas inovativo di Europa. E institucion cu tin un historia di casi 600 aña y a wordo funda pa Papa Martin V. Awendia e universidad ta mas conoci pa tecnologia como tambe teologia: KU Leuven ta un di e organisacionnan di desaroyo mas grandi y independiente na mundo. Prof. dr. Danny Pieters, tabata na Aruba pa firma e acuerdo y prome cu esaki un otro biaha caba, ta vice rector di Humanidad y Ciencia Social y vice rector pa Politica Internacional na KU Leuven. "Nos ta fascina cu e ambicionnan sostenibel di Aruba. Nos tabata en busca di opcionnan den e parti aki di mundo y Aruba ta e partner perfecto pa nos", Pieters a bisa. KU Leuven trece Aruba e prome staf academico pa forma y train e docentenan local.

Universidad di Aruba (UA) ta un universidad chikito y unico, y por wordo referi como un institucion academico cu klasnan interactivo unda hopi atencion ta wordo brinda na cada studiante. Universidad di Aruba regularmente ta ofrece programanan di graduacion na e Facultad di Ley, Accounting, Finance y Marketing, Hospitality, Tourism Management y Estudionan Internacional Arte y Ciencia. E Facultadnan aki ta ofrece programanan educacional y actividadnan di investigacion como tambe servicionan na sociedad. Director di administracion Patrick Arens di UA a splica cu e Green Faculty ta ofrece programanan cortico na companianan, educacion permanente na profesionalnan cu tin un estudio hopi avansa y un programa di bachelor na studiantenan regular. "Den algun aña nos ta agrega programanan master y tambe PhD's."

Gobierno di Aruba ta haci hopi esfuerso pa yega na un Aruba sostenibel den e sentido mas amplio. E desaroyo sostenibel ta enfoca riba un miho calidad di bida pa e ciudadano di Aruba. E creacion di un pilar economico nobo basa riba conocemento di economia, sostenibilidad y innovacion ta parti di e politica aki, mescos tambe pa reenforsa e lasonan cu Union Europeo.

E desaroyo di e Green Faculty tin sosten di e European Development Fund pa e suma di 13.05 miyon Euro. Cu creacion di e programa bachelor STEM den Sostenibilidad cu ta inicia na 2018, Universidad di Aruba lo provee educacion di calidad y educacion relevante den Ciencia, Tecnologia y Ingenieria. E Green Faculty ta bay atrae studiantenan tanto di Aruba como di henter e region.

Expresionnan haci den e articulo aki no necesariamente ta refleha opinion di ArenaPoliti.co