Den mi carera profesional mi tambe tabatin e privilegio di por a traha cu damanan cu a wordo afligi pa e malesa cancer. Trahando cu Mary Joan Foundation como fitness instructor, mi tabatin casi diariamente contacto cu diferente di e damanan aki. Mi por a vangnan op y mira con dificil nan tabata pasa cu nan condicion. Algun biaha pa siman nos tabata bin hunto y apoya otro pa medio di ehercicionan specifico. No tabata facil pa e personan aki ya cu sacrificionan grandi ta wordo haci tanto emocional, social y financiero. Mayoria di e personan aki ta pasa tratamentonan severo di kimoterapia y radiacion cu ta hortanan di nan energia y vitalidad. Dia aden, dia afo nan tin cu atende cu dolor y mane cu no ta suficiente, ainda mester cumpli como mama, casa y tur tarea diario na cas y trabou. 

60% di personanan cu ta sufri di cancer ta riba e edad di 60 aña y ta e causa numero dos di mortalidad aki na Aruba y mundo.  Cu otro palabra e personan aki ta pasa henter nan  bida ta traha y aporta na impuesto, lastimosamente hopi di nan no lo yega e edad pa disfruta di nan pensioen. 

Den nos programa di gobernacion a tuma na consideracion e personanan cu a traha henter nan bida trabounan fuerte manera entre otro construccion y hoteleria. Ta brindanan e opcion di traha partime y disfruta di parti di nan pesioen.

• Lo introduci flexibilidad den e sistema di pensioen di AOV pa duna e ciudadano cu tin por lo menos 60 aña di edad e opcion pa e por: 
• baha cu pensioen prome cu e cumpli 65 aña cobrando un pensioen reduci;
• traha part time te cu 65 aña cobrando un pensioen reduci banda di su salario.  

E Plataforma E Forsa nobo, POR ta di opinion cu mester di un manera of otro duna apoyo na e famianan aki y purba alivia e peso enorme riba nan lomba. Esaki ta un di e rasonnan cu nos ta kere cu mester duna e oportunidad pa personan cu ta riba 60 aña (y den e caso aki cu un malesa asina devastador) e posibilidad pa disfruta di nan pensioen adelanta.  

Un sistema di flexibilidad di pensioen lo brinda entre otro e personana aki e oportunidad pa por disfruta parcialmente di nan pesioen bon mereci sin mester di haci sacrificionan inhumano. Mi no ta kere cu lo tin un politico of partido cu no lo bay di acuerdo pa duna un ayudo asina na nos ciudadano cu merece di dje y ta pasando un periodo super dificil. Ami por a wak e sufrimento aki di famianan afligi, no solamente na trabou pero a bibe personalmente cu mi mama (d.f.m) cu tambe tabata un pashent di cancer. Cu e flexibilidad aki den pensioen nos por den gobierno duna un apoyo significante pa asina e dianan cu Dios permitinan por pase hunto cu nan sernan keri y no mester pensa con nan ta bay cumpli cu tur nan debernan financiero.

Expresionnan haci den e articulo aki no necesariamente ta refleha opinion di ArenaPoliti.co