Glenbert Croes (MEP): Beach policy mester garantisa espacio pa nos pueblo y turistanan
Den e reunion di comicion di turismo nos a trata tambe e beach policy nobo cu lo wordo implementa. Posicion di fraccion di mep ta haya cu e manera e lo bai wordo implementa lo bai perhudica companianan di watersports chikito. Den nos opinion e beachnan mester ta destina na promer lugar pa nos pueblo y nos bishitantenan.
E beach policy cu lo kier bin cune ta encera orden, regla , coordinacion y organisacion espacio riba beach. Nos ta haya cu tur "stakeholders" mester ta involucra den e proceso di zonifacion di beach. Loke nos kier refuta si ta e percepcion cu companianan grandi a haya cu nos lo ta den contra.
Loke si ta preocupa nos ta por ehempel cu e companianan chikito cu no tin desknan den hotel lo bai wordo limita den bende nan servicio cu nan ta brinda na nos turistanan. Esaki ta di lamenta pasobra e ta crea un unfair competition cu lo "schakel uit" e companianan chikito. Hecho ta cu nos kier pa tin ordo pero e maneho no mester bira discriminativo den ningun forma. E beach policy no por ta unfair pa e companianan grandi, pero tambe e NO por ta unfair pa e watersportersnan chikito y mediano.
Pa termina nos kier enfatisa cu e beach policy mester ta di tal forma pa sigura e espacio pa e pueblo di aruba y nos bishitantenan. Nos ta lamenta E manera con gobierno ta hasiendo awor pasobra no ta tene cuenta cu interesa general sino uno selectivo.
Expresionnan haci den e articulo aki no necesariamente ta refleha opinion di ArenaPoliti.co