Aruba ta den pleno ambiente di campaña politico y AVP ta den un pleno desesperacion politico. Aki mi ta referi na e ex lider di fraccion, kende a wordo degrada riba lista di AVP, sr. Rene Herde.
Sr. Herde ta trece ponencianan di desesperacion pa dilanti, alegando cu sr. Gobernador como hefe di nos pais a “deal” cu sr. Mike Eman tanto na 2009 y na 2013. Indicando kico ta e tareanan primordial di e gobiernonan di AVP. Ambos gobernacion mester wordo analisa y evalua e resultado berdadero di nan maneho. Asina so pueblo di Aruba por husga na drechi, si mester vota AVP si of no. 

1. Sr. Herde ta gaba Gobernador, kende AVP a critica, zundra, coba su mama, protesta dilanti su oficina y tira obhetonan riba su auto den rabia. AVP su hendenan na Canal 90 y sr. Mike Eman a declara cu ta nan a propone pa e cabayero aki a bira gobernador. Cu ta danki na AVP, el a bira gobernador.
2. Ta e gobernador aki a ricibi un ordo di Rey (KB) pa no firma e presupuesto 2014 di gobierno di AVP pa “Ondeugdelijk Bestuur” cu ta Mal maneho. Awor, con sr. Herde por gaba sr. Gobernador a base di cu gobernador a pone ordo riba gobierno pa motibo di mal gobernacion? Mas bien ta un berguensa nacional esaki ta y no elogio.
3. Con sr. Herde ta gaba maneho di AVP, siendo cu na 2015, e propio líder di AVP a bai di acuerdo pa bin cu un ley di supervision, anto sin haya beneficio for di dje tampoco manera na Corsou?
4. Con sr. Herde por gaba di nan maneho, si ta e propio parlamentarionan di AVP a vota VOOR pa e ley (CAFT) di supervision den Parlamento, pa motibo di “ondeugdelijk bestuur?”

Otro ofensa di sr. Herde na e pueblo di Aruba ta cu bou di AVP su maneho, e economía di Aruba a crece.
Publicacionnan di Banco Central ta indica cu NO tabata tin crecemento pero peor ainda, un caida den esaki. Aña 2016 tabata e peor aña y 2017 lo bay ta mescos door cu Citgo no lo habri y turismo lo no conoce un subida. Awor mi por compronde dicon e comision di evaluacion di AVP a degrada sr. Herde di e manera humiyante aki. Nan mes ta haya cu sr. Herde ta un gañado patalogico y consecuentemente a evalu’e como un politico obsoleto.  Hamber pa keda na poder ta pone e politico gasta, pero spierto den manipulacion, trece declaracionnan fofo y infunda pa dilanti.

Mi ta pidi pa e pueblo di Aruba keda vigilante contra mentiranan asina y declaracionnan falso for di seno di AVP. No tabata y no lo bay tin un gobernacion mas malo y desastroso manera esunnan di AVP den historia di país Aruba. E cambio mester bini pa nos tur por ta liber atrobe den nos mesun cas y pa crea prosperidad un biaha mas pa un y tur. MEP mes ta e solucion tur dia y pa semper. Number 19 riba lista di MEP, Karel Maduro.

Expresionnan haci den e articulo aki no necesariamente ta refleha opinion di ArenaPoliti.co