Pa awor e ta bisto cu pa falta di confiansa den Gabinete Eman, Hulanda ta buscando tur forma pa CFT por keda activo na Aruba. Hulanda kier evita a todo costo cu Aruba por bay den default y keda den e situacion di no por cumpli cu su debenan. Un situacion asina ta trece e risico cune cu na final di dia ta e placa di e pagado di belasting Hulandes lo mester wordo usa pa paga debe y Hulanda no kier core e risico ey. Pesey Reino nan a bin cu un organo special yama CFT cu ta wordo usa pa haci e control financiero na e diferente Paisnan den Reino conforme e propio leynan di e Pais.

Mester recupera confiansa
Asina durante e charla di CFT teni na Universidad di Aruba poco dia atras, prof Bakker a cuminsa na bisa cu den bista di e debe haltisimo cu nos Pais tin, nos mester recupera e confiansa pa nos economia por haya florece. CFT a trece dilanti cu ta di sumo importancia pa Aruba tambe logra recupera confiansa internacional. Aki CFT a referi na e confiansa di institutonan di rating manera Standard and Poors’ y Fitch. Tur dos e instancianan aki a degrada nos Pais su rating y esaki ta trece cune e desconfiansa di inversionistanan cu lo desea di inverti na nos Pais of yuda nos cu un fianza na un interes favorabel. Banda di esaki e confiansa di politiek Den Haag tambe mester wordo recupera ya cu tur e drama di nos Minister Eman rond di presupuesto 2014 a haci danio grandi na e bon nomber di nos Pais y na e credibilidad di Gabinete Eman.

CFT como bisado di e berdad y consehero di confia
CFT a referi na su mes como un bisado di e berdad y un consehero cu bo por confia. Nan trabou ta pa splica e situacion manera e ta, no manera nan lo kier pa e ta. Nan ta ofrece transparencia y esey caba ta suficiente. Esaki ta netamente locual Pueblo di Aruba na man di tanto mentira y manipulacion di Gabinete Eman tin mester. Ningun hende ta gusta pa hende stranio bin mete den asunto priva di su cas, pero ora cu bo deja di haci bo huiswerk, otro ta bin hacie pa bo. Esaki ta netamente locual ta pasando awor. Gabinete Eman no a asumi nan responsabilidad y a abusa di e placa di hende sin worry cu mayan. Pesey awor Hulanda a manda CFT bin controla Gabinete Eman pa e por cumpli cu su mesun promesanan haci na e Pueblo di Aruba.

Eman mes a firma pa CFT
No mester lubida cu ta Minister Eman mes a firma pa e supervicion di CFT. Ya for di 2010 caba Minster Eman a bin ta firma protocol cu Hulanda den cual CFT tabata parti di e palabracion. Hasta carta di geen bezwaar a wordo firma na 2014. Y despues di a gaña lucha contra CFT, ta Gabinete Eman mes a pidi CFT pa pasa den presupuesto 2015. Pues ta bisto cu di basta dia caba Hulanda tabata duda den Gabinete Eman y a busca manera pa CFT bira activo na Aruba tambe. Ta e falta di confiansa aki ta pone cu Hulanda ta insisti pa CFT keda activo na Aruba.


10 maart 2015

Expresionnan haci den e articulo aki no necesariamente ta refleha opinion di ArenaPoliti.co