Ley pa defende interes di pueblo y di muchanan 

Siman pasa e comision cu ta trahando riba preparacion di e ley pa Ombudsman, a reuni pa trata diferente aspecto den e fase di preparacion di e ley aki, cu lo ta un ley cu lo bira un forma pa pueblo y muchanan principalmente, wordo defende contra di situacionnan cu presenta cu no ta sirbi nan interes.

E ley lo yuda canalisa tur keho di pueblo y atende situacionnan cu no ta na interes di nos muchanan, pa asina busca y yega na un solucion adecuado cu ta sirbi interes total di pueblo.

E reunion a wordo dirigi pa Presidente drs Marisol Lopez-Tromp, kende hunto cu otro miembronan di e comision pa Ombudsman, a trata diferente asunto den e trabao di formalisacion di e ley cu lo mester wordo oficialisa pa medio di un decreto Nacional, dia prome di januari 2016.

Tres punto importante a wordo trata den e reunion aki y esaki a wordo atendi pa miembronan di e comision, esta Desiree de Sousa-Croes, Lorna Jansen-Varlack, Donny Rasmijn, drs. Mervin Wyatt-Ras, Guilfred Besaril y mr Andin Bikker hunto cu otro expertonan di gobierno riba e proyecto di ley aki.

Como invitado pa e reunion aki, tambe a asisti sra Sahaira Kelly, kende ta termina su estudio di ley na Universidad di Aruba caminda e titulo di su ‘masterscriptie’ a bira “Een Ombudsman voor Aruba: een must?”  y kende a brinda su sosten y cooperacion cu su experiencia cu el a acumula na momento di skirbi su rapport final di su estudio na universidad.

Expresionnan haci den e articulo aki no necesariamente ta refleha opinion di ArenaPoliti.co