Minister di Cultura Otmar Oduber a entrega e diccionario di British Color Council na e director di Archivo Nacional Sr. Raymond Hernandez pa asina aki pone esaki disponibel pa comunidad di Aruba.
Sr. Raymond Hernandez a splica riba e diferente discusionnan cu tabatin e tempo ey en cuanto e color exacto di e bandera, unda desde 1976 caba tabata papia di color di e bandera cu lo a bay fout cu esunnan proveniente di Haiti.
Dor di entrega e diccionario aki na ANA, Minister Oduber kier pone esaki disponibel pa comunidad di Aruba.
Den tur e 18 aña di discusion y e diferente comisionnan, ningun por a presenta e diccionario cu e color di e bandera.
E mandatario ta spera cu e dicconario aki haya un bon lugar hunto cu e historia berdadero di e bandera.
Sr. Hernandez a gradici Minister di Cultura pa e bunita obsekio na ANA cu tin e colornan di e British Color Council. El a indica cu en berdad pa hopi tempo tabata en busca di e diccionario aki. Esaki sigur lo por yuda pa aclarea cierto aspectonan di loke ta trata nos bandera.
Ora nos repasa e historia di nos bandera berdad na aña '76 pa motibonan di e lucha di Aruba pa su Status Aparte, e tempo ey nos mester a crea nos propio identidad y dicidi di bin entre otro cu e bandera. Tambe el a splica cu ta te despues na aña '77 e la wordo poni den ley kico ta e colornan
Sr. Hernandez a haci uso di e oportunidad pa reconoce tambe Sr. Leo Dorotal (q.e.p.d.) cu a haci un estudio extenso riba nos bandera den e periodo di 2001 pa 2006, unda el a concentra particularmente riba e discucion di e color, unda ya desde inicio na 1976 tabatin hopi discusion riba e color blau di e bandera.
Sr. Hernandez a mustra riba hecho cu tanto e British Council y e UN Blue a haci su cambionan, pues esaki a ocasiona cu a laga e palabra UN Blue afo y a laga Larkspur. Pero mirando cu esaki tampoco no ta existi mas, e unico cos cu a keda ta pa haci estudio pa haya e color exacto den e British Council y bay bek den e lista di colornan existente pa asina yega na esun mas cerca na djele. Esaki tabata e trabou di e comision pa por a yega na un bandera unifica pa Aruba.
'Mi mes persona a traha den centro di bario y a traha na ANA e dianan nacional y en berdad mi ta kere cu sigur nos a yega na 20 diferente color di bandera y a yega tempo berdad pa nos standarisa e color di nos bandera pa nos tur por reconose e colornan,' Sr. Hernandez a bisa.
E diccionario aki sigur lo haya un bon lugar hunto cu e documentonan di historia di Aruba.

Expresionnan haci den e articulo aki no necesariamente ta refleha opinion di ArenaPoliti.co