ORANJESTAD – Minister di Infrastructura Benny Sevinger, presente diaranson mainta na Misa Immaculada Concepcion na Santa Cruz, a anuncia e proyecto di embeyecemento di e area rond di e misa, y cual trabounan lo yega te na e caminda, dorna cu pavers na e bandanan, creando un ambiente agradabel na momento cu e fielnan yega nan Iglesia.

Minister Benny Sevinger, encarga cu Ministerio di Infrastructura, ta esun cu ta encarga cu planning y implementacion di un cantidad cuantioso di proyectonan den tur barionan rond di Aruba, incluyendo e proyecto di embeyecemento rond di Misa Immaculada Concepcion y bisindario.

“Manera nos a bisa ultimo añanan, nos a dicidi di renoba nos producto Aruba y den e renobacion aki, conforme e vision di Prome Minister Eman ta pa ‘upgrade’ tur nos barionan. Nos a pone mas di 24 bario den nos lista y Sta Cruz tambe ta un di nan,” e mandatario a bisa. Ta hustamente den cuadro di e pensamento aki, e mandatario a agrega, diferente area di Sta Cruz a y lo sigui haya atencion.

“Minister President a pidi pa e puntonan cu ta central den un comunidad haya su debido atencion den henter e desaroyo aki. Den caso di Sta. Cruz, ta bay tin construccion edificio multifuncional di MFA y Iglesia cu ta hunga un rol central den henter desaroyo di e bario di Sta Cruz.” El a splica cu Prome Minister Eman a pidi Infra-Team pa averigua cual ta e necesidadnan, hunto cu Parokia di Sta Cruz y kico por wordo inclui den e programa di renobacion di barionan. A scoge pa cuminsa drecha e acceso na e misa, e dos scolnan, embeyece e area den un forma structural pa tur hendenan por haci uzo optimal di e area en cuestion.

Pa logra ehecuta e plan, a consulta cu comision di e Iglesia y hendenan di e bario pa yega na un plan cu tur hende ta conforme cu ne. Na momento cu e plan tabata cla, e siguiente proceso di bay busca e fondonan cerca FDA pa despues bay destaho publico cu a wordo gana door di e compania BIC NV. “Nos tin hopi experiencia cu BIC den otro proyectonan unda cu nan a haci un tremendo trabou y ta cumpli cu e condicionnan, principalmente e tempo stipula, cu ta importante pa e Iglesia y scolnan.”

Minister Sevinger tabata hopi contento cua yega na e punto caminda cu e proyecto ta cuminsa y a expresa cu Sta Cruz tin atencion di Gobierno pasobra no solamente pronto lo cuminsa cu construccion di e edificio di MFA, pero canchanan deportivo a bin ta hayando hopi atencion principalmente for di Prome Minister Mike Eman, pero tambe tin cayanan cu a wordo drecha. “Pesey pabien na Sta. Cruz.”

Si tur cos bay segun schedule, denter di 80 dia e proyecto ta wordo entrega.

Expresionnan haci den e articulo aki no necesariamente ta refleha opinion di ArenaPoliti.co