Tin mas cu un Dios na Aruba? 
Na Aruba, tin demasiado hopi hende cu ta kere cu nan ta Dios. Manera nan haya un puesto halto, nan ta pensa cu nan tin mag di mishi cu e pan di hende humilde. Mike Eman ta un di nan. E ta kere cu e ta Dios na Aruba. Tur hende mester ta di acuerdo cu n'e. Pero pakico tur esnan rond di dje, ta laga e mal maneho di Mike Eman sigui? Nan tin miedo di Mike Eman? Nan ta alab'e ciego, nan no sa miho of nan no ta worry? 

Bon Gobernacion a la MEP
AVP a destrui politica di Aruba, implementa den mente di pueblo, cu tur cos ta culpa di MEP, aunque nunca MEP a hinca pueblo di Aruba den problema. Por ehempel, nunca MEP tawata tin un presupuesto cu no por a wordo firma. Nunca ningun di e Gabinetenan di Nelson Oduber a ricibi un KB di Hulanda pa stop su Gobierno di derota placa di pueblo! Ni cu Gobierno di MEP mester a negocia di e nomber di e ley cu lo pone Gobierno di Aruba bou curatela. Al contrario. Awor a sali na cla, basa riba e protocol firma na mei 2, cu Gobierno di AVP mester zorg pa Aruba su situacion financiero bira un Balanced Budget bek! Nos finansas mester bin bek na e nivel cu Aruba tawata tin na 2009. Si, e nivel cu AVP a hayele despues di 8 aña di MEP. AVP a wordo manda pa bay haci locual MEP semper a haci: Bon Gobernacion.  

Emanipulacion
Pero Mike Eman, AVP, a crea un duda den pueblo cu medianan cumpra y a manipula e gremionan durante e Dialogo Social. Mike Eman a duna hopi hende e idea cu e ta Dios y esnan den poder tambe lo a sinti manera nan tambe ta casi un Dios. Asina so, mi por splica con e ta posibel, cu esnan cu no ta den Gobierno ta pensa cu e ta husto pa stroba hende humilde di traha pa nan pan di cada dia. Pa menasa trahadornan, te cu nan ta sinti cu nan no tin 'Freedom of Speech'. Casi tur dia mi ta wordo acerca door di hende cu ta wordo abusa na nan trabou of cu a perde trabou pasobra nan a vocifera nan opinion. Tin hopi mas hende, cu mescos cu mi, a wordo manda cas door di AVP, pa nan por preveni cu nos por haya oido den pueblo of pa despues nan bin gaña riba bo cu bo no ta presenta na trabou. Ta p'esey e ta importante pa nos educa nos mes, pa nos sa nos derechonan. E ta importante pa nos sa, cu NO tin mas cu un Dios na Aruba. Nos no mester tin miedo di vocifera nos opinion.

~MSJ

Expresionnan haci den e articulo aki no necesariamente ta refleha opinion di ArenaPoliti.co