Segun Lorna Varlack, ta casnan social so MEP a construi durante 8 aña!

Tin biaha bo tin cu puntra bo mes si e politiconan di AVP ta bon di cabez of si conscientemente nan kier sigui manipula mente di pueblo. Un di e politiconan aki ta e parlamentario Lorna Varlack, un politico ja-knikker cu den un comunicado recien a declara cu “Gobierno di MEP durante 8 aña a traha casnan social so”. Ta increibel e ponencia ridiculo aki di Lorna Varlack y ta muestra cu te ainda e no por biba kere cuanto joya di proyecto a ser ehecuta cabalmente durante tur gobernacion di MEP, esta den e gobiernonan tanto prome cu Status Aparte, tambe durante e periodonan di 1989-1994 y 2001-2009.

Un sin fin di proyectonan di MEP
Lo mas tristo ta cu tabata hustamente sra. Varlack mes cu a fungi como maestra di ceremonia na inauguracion di un proyecto noble cu no por wordo categorisa como cas social, esta e proyecto di Centro Medico dr. Rudy Engelbrecht na San Nicolas y esaki tabata durante gobierno di MEP. Hecho ta cu bo no por ta asina ignorante pa grita cu ta casnan social so MEP a construi, pero bo mester por mira tambe tur e otro proyectonan den tur otro area y sector den comunidad cu a ser ehecuta pa MEP: Construccion y renobacion di schoolnan, construccion di facilidadnan deportivo, construccion di edificionan di gobierno, construccion di wardanan di polis y Ministerio di Husticia, renobacion di monumentonan historico, construccion di terminalnan di bus y areanan comercial, construccion di rotonde y camindanan etc. E lista y fotonan di tur e mas cu 200 proyectonan ta disponibel pa Lorna averigua pa su mes si esaki ta berdad of no!

Lorna tin trabao pa haci
Ta parce cu Lorna Varlack tin tur e stof di klinkers den su wowonan, ya cu te ainda – despues di 6 aña – e no kier mira ni reconoce tur e proyectonan – cu no ta casnan social so - ehecuta durante gobernacionnan di MEP. Ora cu Lorna ta declara cu ta casnan social so a ser construi durante 8 aña di MEP, esey ta demostra un biaha mas con grandi e odio y envidia ta biba ainda den curason di Lorna Varlack.
Locual MEP kier sugeri Lorna ta cu como bon San Nicolasero su persona pone poco presion riba su gobierno y percura pa completa e Centro Medico San Nicolas cu su Centro di Cardiologia y cual proyecto te ainda ta ser boycotia door di Gabinete Mike Eman. Varios di e localnan (12 camber di 1 y 2 persona, post, oficina di enfermera) ta para bashi y hopi instrumento medico (sterilisatie machine) ta para pornada ta putri. E fotonan adhunto ta papia pa nan mes. Aki Lorna Varlack tin un trabao pa haci, na lugar di skirbi disparate sin pia sin cabez. Talvez si e haci su esfuerso pa Gabinete Eman termina cu e Centro di Cardiologia mas pronto posibel, su persona lo por bolbe fungi como maestra di ceremonia na inuauguracion di e centro aki.

Expresionnan haci den e articulo aki no necesariamente ta refleha opinion di ArenaPoliti.co