MEP: Incertidumbre total pa loke ta tur e proyectonan cu Gabinete Eman kier ehecuta den e proximo añanan
Mientras Mike Eman ta verf y chapi den barionan,
![Corta yerba](/images/imagen/Corta_yerba.jpeg)
Propaganda politico
Ta increibel con Minister President Mike Eman den oranan di trabao - ganando mas cu 17 mil florin pa luna di placa di pueblo - ta haci propaganda politico cu su bishitanan den bario, mientras cu nos pais ta yena di problema, tanto financiero, economico, social, educacional y di criminalidad. Problemanan cu mester wordo atendi y soluciona rapidamente, ya cu nos pais ta hinca mey mey di un crisis financiero nunca visto y cu tur e consecuencianan cu esaki ta trece cune pa loke ta e otro sectornan den nos comunidad.
Promesa y mas promesa
Den transcurso di e ultimo 6 añanan Mike Eman y su gabinete a priminti pueblo un gran cantidad di proyecto y di cual mayoria den bista di MEP no tin ningun prioridad. Pero hecho ta cu Mike Eman mes no ta kere mucho mas den su storianan fabrica, ya cu na lugar di traha riba e proyectonan aki, su persona ta prefera di bay verf cas, chapi y corta yerba den oranan di trabao. E siguiente promesanan Mike Eman y su ministronan a haci na e pueblo Arubano durante e ultimo 6 añanan:
1. Construccion di Hard Rock Hotel y despues Hyatt na ex-Bushiri Hotel, 2. Renobacion di John F. Kennedyschool, 3. Renobacion di e edificio di ex-Voogdijraad den Emanstraat, 4. Construccion di un Parke den Emanstraat (ex-Texas), 5. Construccion di un Parke Rietveld dilanti ex-Brenchi, 6. Construccion di un hotel all inclusive den Sero Colorado, 7. Construccion di un hotel den Mainstreet San Nicolas, 8. Construccion di un hotel den Caya Betico Croes, 9. Construccion di un hotel den Tiera del Sol, 10. Construccion di un hotel na Isla di Oro, 11. Construccion di Green Corridor, 12. Construccion di e Ringweg, 13. Construccion di casnan di Smart Community na Kibaima, 14. Construccion di un HAVO/VWO school na Noord, 15. Construccion di 3 parkeergarage na Playa, 16. Construccion di un Warda di Polis na Playa, 17. Renobacion di varios school cu ta den deteriorio total, e.o. Bonifacius y Rosa College.
Stagnacion completo
Esakinan ta parti di tur e promesanan falso haci door di Gabinete Eman, pero ta visto cu Minister President Mike Eman mes no kier traha tempo pa sinta hunto cu su otro ministernan pa ehecuta tur e proyectonan menciona. No por otro tampoco, ya cu Mike Eman mes lo ta contra di laga construi mas hotel, mirando e hecho cu segun su propio programa di partido ta ser papia di un moratorio pa loke ta construccion di hotelnan y awe su propio Ministro di Turismo kier laga construi un gran cantidad di hotel adicional riba e isla aki. Alavez e school HAVO/VWO cu pa MEP y e pueblo di Noord ta un prioridad te ainda esaki ta un sumpiña den wowo di Mike Eman y siguramente e lo no kier papia, corda pa traha riba e proyecto noble aki. No mester lubida tambe cu IMF y CFT a desconseha Mike Eman pa continua cu e proyectonan PPP, ya cu esakinan lo crece nos debenan nacional mas y mas.
Asina pues nos por mira cu tur e proyectonan menciona ta stagna completamente y cual ta trece cune mas duda y incertidumbre den pueblo pa loke ta e rumbo cu Gabinete Mike Eman kier hiba e pais aki.
![Bushiri1](/images/imagen/Bushiri1.jpg)
Expresionnan haci den e articulo aki no necesariamente ta refleha opinion di ArenaPoliti.co