E siman aki empleadonan di Kooyman hunto cu nan famia a cuminsa haci preparacionnan pa decoracion di e rotonde di Tarabana. Kooyman lo bisti e rotonde di Fiesta pa celebra nan 75 aña di existencia.

A forma un team di 15 empleadonan, kendenan a traha riba loke tema mester ta bay y naturalmente e decision a cay pa recorda e 75 aña di existencia di e compania aki.

Jelisse Boekhoudt, kende tabata diamars anochi na rotonde mientras cu empleadonan a cuminsa cu decoracion di e palonan di mata cu luz a splica cu Kooyman Megastore "lo bini cu un bunita proyecto pa hinca e pueblo di Aruba den e ambiente di fiestanan di fin di aña."

Proyectonan di Pasco ta wordo presenta door di Servicio pa Comunidad y Bario (Team BoBario) di Ministerio di Asuntonan General di Prome Minister Mike Eman. Hustamente e Prome Minister a bin ta promove e proyecto aki bou di e prome gobernacion cu el a lidera, promoviendo comunitarisma unda cu e hendenan ta traha hunto pa trece algo bunita pa nan bisindario y Aruba en general.

Sra. Jelisse Boekhoudt a recorda cu Kooyman a cuminsa den Dakota, di cual Tarabana ta forma parti di dje, y kier a regala e bario algo bunita cu e rotonde su decoracion. "E lo ta algo grandi y hopi bunita sigur." E rotonde lo ta decora cu un botter di champaña basta grandi ta basha awa den un kelki, naturalmente combina cu e caricaturanan di fiestanan di fin di aña manera e popchi di sneeuw, Santa Claus, un casita candy cu tur sorto di mangel (nunca mira na Aruba). "E lo ta algo espectacular cu for di leu tur hende por mir'e for di leu."

Tur e proyecto aki a wordo coordina door di un team di 15 empleado, kendenan a contribui cu idea pa forma e concepto completo. Mientras cu un grupo a cuminsa instala e luznan na e rotonde, na Kooyman tin otro grupo di empleado trahando riba e figuranan, hinca nan den otro y decora nan na final. Den henter e proyecto aki a envolvi e empleadonan y tambe nan famia.

E team tin un programa special prepara pa e apertura cu lo tuma luga dia 5 di november awor. Pa e anochi lo tin pa e publico presente, e grupo di gaita di e muchanan di Mama Rosa cu lo duna un presentacion pa dos ora largo. Tin un bar y cushina di e empleadonan mes di Kooyman Mega Store. Henter pueblo di Aruba ta ser invita pa ta presente dia 5 di november awor pa 7'or di anochi ora cu e rotonde  di Kooyman keda inaugura.

Expresionnan haci den e articulo aki no necesariamente ta refleha opinion di ArenaPoliti.co