ORANJESTAD – Lider di MEP Evelyn Wever-Croes den conferencia di prensa a splica dicon awor atrobe ta discutiendo riba Green Corridor, siendo cu ya 3 anja pasa e mayoría di AVP den Parlamento a duna e Minister e autorisacion pa sigi cu e proyecto. Tur cos a cuminsa cu un carta cu Minister Sievinger a manda Parlamento dia 10 di juni ultimo. Riba su mes e contenido di e carta tin hopi cos contra ley y cuestionabel unda cu ta pidiendo sumanan adicional pe proyecto, sin kier specifica cuanto. Den e carta e minister ta informa cu lo bai gasta mas di loke Parlamento a aproba na 2011.

E ley cu a pasa na 2011 a laga solamente espacio si encaso prijsnan subi pero no pa sumanan extra. Ta stranjo cu awor minister kier duna e ley un interpretacion diferente, pero no kier cambia e ley. Remarcabel ta cu e kier hasi esaki sin bin Parlamento y aparentemente e lo kier djis firma. Mas y mas no ta haya informacion cu tin cosnan stranjo ta pasando relaciona cu e proyecto aki, y mi kier avisa tur hende cu coopera pa firma sin cu Parlamento trata esaki, cu nan ta cometiendo un acto ilegal.

Loke ta stranjo ta cu awor tin un grupo envolvi cu no ta Odinsa mas pero diripiente e grupo Odinsa cu a bringa hopi tempo den Corte, a cambia y awor Gobierno ta deal cu Caribbean Infrastructure Company. Tambe tin entendi cu ta e compania aki lo bai presta placa na Deutsche Bank. Akinan ta unda cosnan stranjo ta cuminsa y ta pesei nos fraccion a pidi un reunion publico cu Minister Sievinger cual ta planea pa tuma lugar 29 juni 2015. Door cu Minister Sievinger no ta na Aruba, presidente parlamento a informa Minister Sievinger cu e lo no bai firma nada tanten cu Parlamento bai trate.

Ta tempo pa Aruba para keto y pensa si e proyecto aki ta necesario si of no, especialmente en vista di e Mega Debe di nos pais, y tur e medidanan cu tin nos dilanti. Verdad e idea di e Green Corridor cu mata planta banda di caminda por ta bunita, y e ta un alivio pa esnan cu ta frequenta e ruta, cu bo por yega bo destino 5 minuut mas trempan, pero mester pone esaki den balance. Awor cu e gobierno aki a sera e refinería, e situacion financiero di nos pais ta hopi critico. No ta husto pa pone nos yiunan y nan yiunan paga pa un proyecto asina grandi awor. Talves por ora e situacion financiero di nos pais ta mihor, según lider di MEP Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co