Fraccion di AVP: E "Green Corridor" ta bon pa Aruba y pa pariba di brug
![Green Corridor Aruba](/images/779x490/28062015-greencorridor1.jpg)
NIUN DI E ARGUMENTONAN DI MEP CONTRA E "GREEN CORRIDOR" TA CORECTO
MEP ta contra di e construccion di e "Green Corridor": e caminda hancho y moderno entre Playa y San Nicolas. Un miho caminda cu ta sigura un fluho di trafico mas lihe y mas sigur ta importante pa cualkier actividad economico nobo "pariba di brug". Tambepa e waf nobo na Barcadera! E ta hopi importante pa tur hende cu ta biba na Pos Chikito, Savaneta, Brazil, Cura Cabay y San Nicolas. Nan mester por move entre nan cas y otro partinan di Aruba facil y sigur. Esey no ta e caso awor. Hopi gobierno a purba traha e caminda nobo aki. MEP mes tambe. Pero awor MEP ta CONTRA pa traha e caminda aki. Sinembargo niun di nan motibo of argumentonan ta corecto!
MOTIBONAN CU MEP TA CONTRA
1. MEP ta bisa cu e suma cu e ta bay costa ta bay sali hopi mas halto. Hasta casi tres biaha mas caro segun nan. Esey NO ta corecto! Segun e expertonan den e comision cu ta traha riba e proyecto grandi aki, e suma ta bay keda den e suma aproba di 292 miyon florin. Dialuna den e reunion ta bay mustra esey un biaha mas.
2. MEP ta haya cu por a traha e proyecto mas barata. Segun e expertonan di DOW, hurista y expertonan financiero, no por traha un caminda asina largo, hancho y di e calidad mas halto cu e ta bay tin, pa menos cu suma ey. Ta pesey e.o. a dura asina tanto tempo pa yega na un acuerdo y cuminsa e construccion. Ademas e contratista mester mantene henter e caminda pa 18 aña. Den e periodo aki Aruba ta paga e suma di e construccion bek.
3. MEP ta haya cu e minister mester traha un ley nobo pasobra e ta bay surpasa e suma original. Esey no ta corecto tampoco segun e comision di experto. En caso cu pa cualkier motibo fuera di alcanse di e contratista of di gobierno e costo lo por subi den futuro, ta via presupuestonan di gobierno tin cu ahusta e suma total. Esaki ta loke a sosode den pasado tambe cu otro proyectonan di gobierno di MEP mes tambe!
4. MEP no ta haya cu mester di un caminda grandi y bunita pa "pariba di brug" manera esun cu a traha pa bay hotelnan na Palm Beach. (Sasaki plan). E argumento aki ta esun cu di berdad MEP ta mas convenci didje. Simpelmente MEP no ta kere cu henter e area di "pariba di brug" y tur su habitantenan, negoshi y organisacionnan social, merece un inversion asina grandi y un infrastructura di caminda asina bon y duradero. Esey ta nifica cu pa MEP "pariba di brug" mester keda atras den desaroyo. E refineria cu ta susha medio ambiente y daña nos salud si ta bon. Pero un desaroyo completamente nobo, limpi, duradero y cu ta crea actividad economico y trabao "pariba di brug" mes, no ta bale la pena segun MEP !
![28062015 greencorridor](/images/imagen/28062015-greencorridor.jpg)
Expresionnan haci den e articulo aki no necesariamente ta refleha opinion di ArenaPoliti.co