Delegadonan di mas di 26 diferente pais presente riba nos isla 

Delegadonan di departamento di agricultura di mas cu 26 pais ta na Aruba pa participa na un foro cu ta hiba e nomber di Caribbean Plant Health Directors. Diamars mainta a tuma lugar e apertura oficial unda Minister Otmar Oduber a hiba palabra.

E mandatario a inicia splicando con facil e ta awendia pa nos yega na destinacionan rond mundo tanto via avion como tambe via laman. Esaki no ta conta solamente pa hende pero e ta demostra tambe con facil e ta, pa ricibi bishitanan indesea manera un invasion di bestia cu lo tin su consecuencianan devastador pa nos naturalesa.

Un ehempel cu ainda ta fresco den nos memoria ta e invasion di e Red Palm Weevil, unda pormedio di attende e Caribbean Plant Health Directors na 2009 na Guyana, nos a logra di haya ayudo pa combati esaki.  Santa Rosa mesora a manda un prueba pa laboratorionan di United States Department of Agriculture. Despues di ricibi un confirmacion mesora un equipo technico a bin Aruba. A instala 6 trampa den e matanan den e area hotelero unda pa februari 2014 a concluyi e proyecto cu 21 trampa. Mayoria  hotel a tuma e medidanan necesario y no tabata kier e tipo di palma aki mas riba nan propiedad. Manera cualkier isla chikito pa instala un regualcion di un tratamento fitosanitario, no ta facil. Aunke tin un control severo ainda e Red Palm Weevil ta riba nos isla. Locual ta mas alarmante ta, cu un invasion chikito por tin un impacto economico grandi pa nos isla mirando cu Aruba ta depende di e industra turistico.

Minister Oduber ta bisa “Nos ta conciente cu invasion asina aki por tin consecuencianan grandi riba nos biodiversidad chikito y nos ecosystema. Pesey ta importante pa nos continua di establece un regulacion pa un tratamento fitosanitario. Formando parti di Caribbean Plant Health Directors Forum, sigur ta juda den e aspecto aki.”

Minister a termina bisando cu e ta agradecido cu Caribbean Plant Health Directors a scohe Aruba como anfitron e aña aki, y a desea tur e participantenan un foro fructifero pa yega na plan di acion aplicabel na bienestar di nos matanan.

Expresionnan haci den e articulo aki no necesariamente ta refleha opinion di ArenaPoliti.co