Con por ta posibel cu WEB N.V. y Elmar N.V. ta hinca miyones di florin den conferencianan green, paga Al Gore, companianan amigo di relacionnan publico, luznan LED (12.2 miyon florin na Phillips), yena e empresanan cu activistanan di AVP, paga director 300 mil florin pa core cune, anto awor ta cla pa suta pueblo atrobe cu aumento di prijs di coriente? No mester lubida aki tambe e debacle di 300 miyon florin di hedging! 

Unda tur e placa a bay?
Con por ta posibel cu Elmar a gana netto na 2011 mas cu 11 miyon florin y na 2012 un suma di 12.9 miyon florin, pues den 2 aña casi 24 miyon florin, anto awor ta cla pa bolbe suta nos cu otro aumento di prijs di coriente? Ya caba na 2014 a aumenta e prijs di coriente cu 15%. Cu esaki nan a haya 70 miyon florin extra caba. Unda tur e placa aki a bay? WEB N.V. a gana 16 miyon florin durante 2012-2013. Pues den total,WEB y Elmar a gana 40 miyon florin, anto mester aumenta awor e prijs di coriente? Prijs di crudo ta 60 pa 70% mas barata cu tempo di Gabinete Oduber, plus a baha e consumo di fuel oil cu 40%. No lubida  e 10 molinanan di biento, e 4 plantanan di Wärtsila di Finlandia, e planta di awa Seawater Reverse Osmosis di 8000 ton, tur e inversionnan aki di Gabinete Oduber a reduci e consumo di fuel oil di 6000 bari pa dia cu 2494 bari, cu ta 40% menos fuel oil - equivalente na 160 miyon florin – y cu logicamente a baha e gastonan di produccion di awa y coriente drasticamente. Cu Gabinete Eman a yena WEB y Elmar cu pata pata di activista di AVP, esey nan mes mester carga e consecuencianan. Si bo conta e 40 miyon florin di ganashi y e 160 miyon florin menos na fuel oil, ta un espacio di 200 miyon florin.

Fiesta y mas fiesta
Na 2013 a bende na coriente 324 miyon florin, unda e promedio entre e 42210 consumidor ta 18671 Kwh, anto e entrada di Elmar lo a subi cu por lo menos 70 miyon florin cu e aumento di 15% na 2014. WEB a masacra na 2012-2013 un suma di 7 miyon florin na Consultancy fees, 800 mil florin na Public Relations, na 2012 a cera un contract di 3 aña cu Kuzeta Aruba N.V.(?) pa 7.2 miyon florin. Tambe a lease 44 auto desde 1 di juni 2010 pa 4 aña pa un suma di 2.2 miyon florin. A paga pa “Transportation (?)” un suma di 1.8 miyon florin.  Mescos mester publica tur e fiestanan na companianan di amigonan di AVP. Cuanto nan tambe a cobra na Elmar N.V.? Cuanto “friends , family and lovers” a pak eyden?

Comisarionan ta responsabel
Keda  pendiente pa nos mustra pueblo con Mike Eman a plunder WEB y Elmar y logicamente cu cooperacion di Utilities N.V. A base di e reglanan di “Good Governance” mester pone tur e comisarionan personalmente responsabel pa coopera y pa yuda amigonan, companianan sponsor chica WEB y Elmar y awor ta cla pa suta pueblo cu otro aumento.
Nada no por keda scondi mas pa publica kendenan a caba cu WEB y Elmar, mientras prijs di fuel oil ta varia entre 40 y 50 dollar pa bari. No por, no por! Anto segun Goldman & Sachs e prijs di fuel oil lo por baha te na 20 dollar. Ki dia ta bin un investigacion riba e hedging y tambe e contract cu ECO Gas, unda tin 2 comisario cu conflicto di interes? Cuanto WEB a paga pa e infrastructura di e proyecto ey y unda e dos contractnan di hedging y Eco Gas ta? Ki dia parlamento y pueblo ta haya esakinan pa mira?
Finalmente, sigui cera Arubianonan balente cu a lucha pa nan pais debi na un paar di bentana kibra, anto e ‘white collar crime’ mes mester keda scondi atrobe!

Expresionnan haci den e articulo aki no necesariamente ta refleha opinion di ArenaPoliti.co