For di basta tempo caba UPP a haci preguntanan riba posibel casonan di malversacionnan haci door di cierto specialistanan.
Ta trata aki di specialistanan trahando den servicio di HOH, y otro specialistanan cu ta traha pa nan propio cuenta.
En todo caso, nan lo a participa den manda declaracionnan pa AZV di tal forma cu e organo a haya necesario pa start un investigacion forensico door di un compania estableci na Corsou.
Te awe ningun contesta di e resultado di e investigacion cu a tuma lugar.
Pueblo di Aruba mester sa kendenan ta e specialistanan cu a haci nan mes culpabel na esaki, y di cuanto placa nos ta papia.
UPP lo bay menciona nomber, si den dos siman AZV, HOH of Minister no bin padilanti y informa comunidad riba e actonan penal aki, pasobra nos ta kere cu pueblo tin derecho di sa kiko ta sosode cu su placa cu e ta paga na prima di AZV.

Den pasado ya caba a manda investiga dr. Casper Lacle, tempo cu esaki a haci su mes culpabel na malversacion.
Ta kiko tin di sconde, y dicon kier proteha esnan cu awor a wordo pidi pa bin duna cuenta??
Dicon un agente policial cu supuestamente a "sjoemel" cu un paar di bon di cuminda, sí ta wordo deteni (corectamente), y e specialistanan ta wordo protehi, tanto door di e gerencia di HOH, AZV y minister.
Un di e specialistanan te hasta a fungi como Director interino pa varios luna y alabes ta involvi den e proyecto di renobacion/expansion di HOH den e "bouwcommissie", y e otro a wordo honra pa bay traha riba su mes.
Con por ta posibel cu un minister por bay di acuerdo cu nombracion di un director interino, siendo cu e ta na altura cu esaki tabata bow investigacion?
Y con por ta posibel cu e mesun minister aki ta bay di acuerdo pa laga e otro bay traha riba su mes, siendo cu e sa kiko tabata ser haci cu e malversacionnan cu e declaraties durante "waarneming"??
Y pa colmo, e mesun specialistanan aki ta wordo invita door di e director di AZV, pa pronto bay haci operacion na IMSAN, pero lagando un banda esun cu a trece henter e asunto di malversacion aki padilanti, cu e argumento cu e "klokkeluider" aki a desapunte, y ta door di dje e mester a laga haci un investigacion.

Dia 4 di september 2015 specialistanan a ricibi un carta (#15/0704-AR/ms) na unda AZV a bin cu un maneho nobo riba "waarneming" di specialistanan.
Y esaki ta hustamente pa evita cu tipo di malversacionnan cometi door di e specialistanan den OK, bolbe ripiti.
Ta hopi straño cu no ta bisa cu esaki a bini DESPUES cu un investigacion a wordo haci y a wordo proba cu fraude a wordo cometi!
Dicon?
Dicon gerencia di HOH no a tuma paso contra e specialista(nan) cu haci nan mes culpabel na e delito aki?
Amistad entre un di e dos directornan di HOH, y e specialistanan a hunga un rol?
Dicon a haci investigacion di un aña so?
E informacion cu nos tin, ta indica cu e malversacionnan aki tin hopi aña caba ta sosodiendo y cu varios otro specialista.

Den e carta aki e director di AZV ta bisa cu e no tabata na altura cu tabata declara den un sistema di "gesloten beurs". Hopi straño, pasobra den un carta di un di e specialistanan concerni, e ta bisa cu AZV tabata na altura.
Ta ken ta gaña?
"Gesloten Beurs" kiermeen cu ora un specialista reemplaza un otro specialista, e patient ta keda patient di e specialista en cuestion. Y e specialista cu ta traha riba su mes, ta cobra pa esaki.
Pero mirando e hecho cu AZV no tin "inzage" den e administracion di HOH, y e specialistanan en cuestion cada un sa esey, e specialistanan deliberadamente a haci maluso di esaki, y door di e maniobra aki tanto HOH como e specialista, cu ta traha pa su propio cuenta, a cobra pa mesun cos.
Dus BO placa di AZV parcialmente a ser hinca den saco di e specialistanan aki, door cu ta cobra AZV dos biaha pa mesun cos.
Esaki no ta ladronicia??
Y aki no ta un paar di bonnan di cuminda, pero miles di florin, y esaki den un aña so, y dor di dos specialista so. Segun e fuente di nos, ta hopi mas casonan tin.
Dicon e director di AZV ta bisa awor cu e no tabata na altura?
Y pa colmo, si den futuro esaki bolbe ser haci, simpelmente mester paga back y ta pasa pa ordo di dia. Esaki djis pa proteha esnan cu a comete e ladronicia aki, y nan "get-away" cu un simpel "terugbetaling"!!!

Tempo cu e denuncia a ser haci di e malversacionnan aki y a hiba esaki pa e gerencia di HOH, e gerencia a mande mesora pa AZV pa haci un investigacion. Esaki a tarda masha hopi pa a cuminza. Ta despues cu UPP a keda insisti, AZV a bin dilanti bin bisa cu a inicia cu e investigacion.
Loke nos a bin compronde, ta cu tabata hopi dificil pa haya informacion di parti di gerencia di HOH.
Esaki tin di haber cu e hecho cu un di e dos directornan di HOH ta bon amigo di e dos specialistanan aki??
Si esey ta e caso, pasonan mester ser tuma contra e director aki pa obstaculizacion di investigacion.
Ta tristo pa constata cu intentonan ta ser haci pa "cover-up" henter e asunto aki, y UPP ta kere cu esaki no mag di wordo permiti.

E pregunta grandi ta, dicon no a bay Ministerio Publico cu e caso aki?
Dicon e minister no ta mustra dede awor?
Aki tin prueba di un compania IMPARCIAL forensico cu e actonnan aki a ser cometi, y dicon no ta actua?? Ministerio Publico MESTER actua "ambtshalve", y si den dos siman esaki no sosode, UPP lo haciele, mescos cu mencionamento di nomber.
Pa completa e obra, ata e gang di estafadornan aki lo bay duna servicio 24/7 na Boneiro, pa gana DOLARS, privando asina ey NOS pueblo cu ta paga nan pa ta na Aruba.
Ta esaki ta e motibo pakiko nos hendenan mester warda asina hopi, y pa nada otro!
Door di esaki nos cuido medico specialisa ta wordo pasa pa "zaalartsen", pa e "geldwolven" aki gana dolars na Boneiro.
Mi no por imagina mi mes cu ni AZV ni e minister no sa esaki.
Te ki dia nos ta bay keda acepta e abusonan aki, cu AZV, cu e minister y cu e gobierno aki ta tolera??

Pueblo ta wordo priminti un servicio di 5 strea, loke e NO ta ricibiendo, pero pueblo lamentablemente SÍ ta wordo obliga pa paga mas prima y BAZV.
Ta p'esey UPP no ta simpelmente duna un informacion, pero tambe publicamente ta acusa (J'ACCUSE) tur esnan cu ta trata di haci comosifuera nada no a pasa.
Y si den dos siman no bay OM y no menciona nomber, UPP lo haci esaki.
Un suplica ta bay na Parlamentarionan pa lanta para y exigi transparencia di parti di minister y AZV.                                   


Den nomber di Union Patriotico Progresista – U.P.P.
Candelario A. S. D. Wever
Brazil, september 27, 2015

Expresionnan haci den e articulo aki no necesariamente ta refleha opinion di ArenaPoliti.co